३५ किलो गाँजासहित अटोरिक्सा सशस्त्र प्रहरीको नियन्त्रणमा

काठमाडौं । सशस्त्र प्रहरीले सुनसरीबाट ३५ किलो गाँजासहित एउटा अटोरिक्सालाई नियन्त्रणमा लिएको छ।

जिल्लास्थित बर्जु गाउँपालिका–६ चिम्डी बजारबाट ३५ किलो गाँजा र अवैध गाँजा तस्करीमा प्रयोग भएको अटोलाई नियन्त्रणमा लिएको सशस्त्र प्रहरीले जनाएको छ। 

सशस्त्र प्रहरीका अनुसार विराटनगरबाट चिम्डीतर्फ आउँदै गरेको को १ ह ९३३३ नम्बरको अटोबाट सशस्त्र प्रहरीको बिओपी साहेवगंजको चेकप्वाईन्ट टोलीले उक्त ३५ किलो गाँजा फेला पारेपछि अटोलाई नियन्त्रणमा लिएको हो ।

सशस्त्र प्रहरीले दिएको जानकारी अनुसार अटोरिक्सा चालक भने सशस्त्र प्रहरीको टोलीलाई देख्नासाथ अटोबाट झरेर  फरार भएका थिए ।

बरामद गरिएको उक्त गाँजासहित नियन्त्रणमा लिइएको अटोलाई आवश्यक कारवाहीको लागि सम्बन्धित निकायमा बुझाइएको सशस्त्र प्रहरीले जानकारी दिएको छ।