अपराध नियन्त्रणमा सक्रिय रहन प्रहरी कर्मचारीलाई आईजीपी कार्कीको निर्देशन

काठमाडौं । दान बहादुर कार्की ले सबै प्रहरी कर्मचारीलाई उच्च व्यावसायिकता प्रदर्शन गर्दै थप अनुशासित, निष्ठावान र इमानदार बन्न निर्देशन दिएका छन्। उनले उत्कृष्ट व्यवहार, बोली र बचनलाई आत्मसात् गर्दै नागरिकको अपेक्षा अनुरूप जिम्मेवारी बहन गर्नुपर्ने बताए।

नेपाल प्रहरी प्रधान कार्यालयबाट बुधबार भर्चुअल माध्यममार्फत आयोजित निर्देशन सम्बोधन कार्यक्रममा उनले उक्त कुरा बताएका हुन्।

उनले निर्वाचनलाई शान्तिपूर्ण, भयरहित र निष्पक्ष वातावरणमा सम्पन्न गराउन प्रहरी कर्मचारीहरूले खेलेको भूमिका प्रशंसनीय रहेको बताए। यसले संगठनको समग्र विकासमा महत्वपूर्ण योगदान पुगेको उनको भनाइ थियो। प्रहरी कार्यलाई नै धर्म र कर्मका रूपमा लिनुपर्ने उल्लेख गर्दै उनले आफ्नो जिम्मेवारी क्षेत्रबारे स्पष्ट जानकारी राखी योजनाबद्ध रूपमा सुरक्षा व्यवस्थापनलाई अझ मजबुत बनाउन निर्देशन दिए।

उनले आफ्नो क्षेत्रमा कुनै पनि आपराधिक गतिविधि हुन नदिन सूचना संकलन र विश्लेषणलाई प्राथमिकतामा राख्नुपर्ने बताए। प्रहरी कर्मचारी सधैं तयारी अवस्थामा रहनुपर्ने उनको भनाइ थियो। साथै सीमा नाकामा हुन सक्ने आपराधिक गतिविधि नियन्त्रण, फरार प्रतिवादी पक्राउ र हातहतियार बरामदजस्ता कार्यमा विशेष सुरक्षा योजना लागू गर्न निर्देशन दिए।

उनले आगामी दिनमा कार्यसम्पादन सम्झौताको प्रभावकारी कार्यान्वयनमा जोड दिँदै हिरासत व्यवस्थापनमा विशेष सतर्कता अपनाउन पनि निर्देशन दिएका छन्।

कार्यक्रममा उमा प्रसाद चतुर्बेदी, सुशील सिंह राठौर र डम्बर बहादुर बिक ले समेत समसामयिक विषयमा निर्देशन दिएका थिए।

कार्यक्रममा वरिष्ठ प्रहरी अधिकृतहरू, विभिन्न प्रदेश प्रहरी कार्यालय, जिल्ला प्रहरी कार्यालय तथा मातहत निकायका प्रमुख तथा प्रतिनिधिहरूको भर्चुअल सहभागिता रहेको थियो।

यसैबीच, प्रहरी महानिरीक्षक कार्कीले हालै सरुवा भई नयाँ कार्यक्षेत्रमा जान लागेका प्रहरी नायव उपरीक्षक र प्रहरी निरीक्षकहरूलाई सफल कार्यकालको शुभकामना दिँदै आवश्यक निर्देशन समेत दिएका छन्।