प्रहरीको कारबाहीमा बर्दियासहित विभिन्न स्थानबाट लागूऔषधसहित १३ जना पक्राउ

काठमाडौं । प्रहरीले बर्दियासहित देशका विभिन्न स्थानमा सञ्चालन गरेको कारबाहीका क्रममा लागूऔषधसहित १३ जनालाई पक्राउ गरेको छ।

बर्दियाको बढैयाताल गाउँपालिका–७ कर्णाली पुलबाट शनिबार दिउँसो २ ग्राम ७१० मिलिग्राम ब्राउन सुगरसहित बाँकेको कोहलपुर नगरपालिका–९ का २१ वर्षीय सुशील परियार पक्राउ परेका छन्।

त्यस्तै, काठमाडौं महानगरपालिका–६ चुच्चेपाटीबाट शुक्रबार राति ४ ग्राम २५० मिलिग्राम ब्राउन सुगर र २० हजार २०० रुपैयाँ नगदसहित ३९ वर्षीय छिरिङ शेर्पा पक्राउ परेका छन्। उनी सिन्धुपाल्चोकको भोटेकोशी गाउँपालिका–३ का बासिन्दा हुन्।

काठमाडौंकै जडिबुटीबाट ६ ग्राम ७४० मिलिग्राम ब्राउन सुगरसहित दुई जना पक्राउ परेका छन्। पक्राउ पर्नेमा २३ वर्षीय गौतम चौधरीसमेत रहेका छन्।

झापाको झापा गाउँपालिका–५ खयरबारीबाट १ ग्राम ९५ मिलिग्राम ब्राउन सुगरसहित २४ वर्षीय खड्ग राजवंशी र २५ वर्षीय चैतन हेमरम पक्राउ परेका छन्।

पर्साको वीरगञ्ज महानगरपालिका–१६ बसपार्कबाट नियन्त्रित लागूऔषध डाइजोपाम २७ एम्पुल, फेनारगन २९ एम्पुल र बुप्रेनोर्फिन २८ एम्पुलसहित २० वर्षीय निमा लामा शेर्पा पक्राउ परेका छन्।

कैलालीको धनगढी उपमहानगरपालिका–४ चटकपुरस्थित होटलबाट १२७ मिलिग्राम ब्राउन सुगरसहित २५ वर्षीय अमरबहादुर कुँवर पक्राउ परेका छन्। होटलको कोठा नम्बर १०४ मा प्रहरीले तलासी गर्दा उक्त लागूऔषध फेला परेको थियो।

कैलालीकै भजनी नगरपालिका–३ कुसुमघाटबाट १ ग्राम ५० मिलिग्राम ब्राउन सुगरसहित २२ वर्षीय रोशन सार्कीसहित दुई जना पक्राउ परेका छन्। प्रहरीले उनीहरूले प्रयोग गरेको मोटरसाइकलसमेत बरामद गरेको छ।

यस्तै, लमजुङको बेसीशहर नगरपालिका–१ देउरालीडाँडाबाट डाइजोपाम, बुप्रेनोर्फिन र फेनारगन १०/१० एम्पुलसहित ३० वर्षीय सुजन तामाङ पक्राउ परेका छन्। सुनसरीको कोशी गाउँपालिका–१ लौकही केराबारीबाट २ ग्राम १७० मिलिग्राम ब्राउन सुगरसहित ३४ वर्षीय दीपक परियार र ३२ वर्षीय बलबहादुर थापा पक्राउ परेका छन्।

प्रहरीले पक्राउ परेका सबैमाथि थप अनुसन्धान भइरहेको जनाएको छ।