बारामा स्वास्थ्य चौकी उद्घाटनलाई लिएर तनाव, प्रहरीको हवाई फायर, गोली लागेर युवक घाइते

बारा । स्वास्थ्य चौकी उद्घाटनको विषयलाई लिएर बाराको फेटा गाउँपालिकामा शनिबार बिहान तनाव सिर्जना भएको छ। दुई पक्षबीचको विवादले झडपको रूप लिएपछि स्थिति नियन्त्रणमा लिन प्रहरीले गोली चलाएको छ। घटनामा एक युवक घाइते भएका छन्।

फेटा गाउँपालिका–३ मा रहेको स्वास्थ्य चौकी उद्घाटनका लागि गाउँपालिका अध्यक्ष रुस्तम अन्सारीसहितको टोली पुगेपछि विवाद सुरु भएको हो। उद्घाटन कार्यक्रमप्रति असन्तुष्टि जनाउँदै अर्को पक्षले अवरोध गरेपछि दुवै समूह आमनेसामने भएका थिए।

विवाद बढ्दै गएपछि झडप भएको र त्यसक्रममा प्रहरीमाथि समेत ढुंगामुढा भएको मधेस प्रदेश प्रहरी प्रमुख डीआईजी ओमप्रसाद अधिकारीले बताएका छन्।

प्रहरीले सुरुमा लाठीचार्ज गरेर भीडलाई तितरबितर पार्न खोजेको थियो। अवस्था नियन्त्रणबाहिर जान थालेपछि प्रहरीले हवाई फायर गरेको डीआईजी अधिकारीको भनाइ छ।

प्रहरीले हवाई फायर गरेको बताए पनि घटनामा एक युवकलाई गोली लागेको छ। घाइते युवकलाई उपचारका लागि वीरगन्जस्थित नेशनल मेडिकल कलेजमा भर्ना गरिएको छ।

ती युवकको पहिचान खुल्न सकेको छैन भने उनलाई लागेको गोली कुन पक्षबाट प्रहार भएको हो भन्नेबारे पनि प्रहरीले यकिन गर्न सकेको छैन।