सशस्त्र प्रहरीका १ सय ६६ जना कर्मचारी कारबाहीमा

काठमाडौं । सशस्त्र प्रहरी प्रधान कार्यालयले सामाजिक सञ्जाल अनुगमन शाखाको निगरानीमा परेका १ सय ६६ जना सशस्त्र प्रहरी कर्मचारीलाई विभागीय कारबाही गरेको छ।

संगठनको नितिनियम विपरीत विभिन्न सामाजिक  सञ्जालमा बर्दी लगाएर फोटो तस्वीर र भिडिओ खिचेर राख्ने १ सय ६६ कर्मचारीलाई सशस्त्र प्रहरी बलले कारबाही गरेको हो।

सशस्त्र प्रहरी प्रधान कार्यालयका  सशस्त्र प्रहरी नायब निरीक्षक (सई) देखि परिचरसम्मका सशस्त्र प्रहरी कर्मचारीलाई नियमविपरीत कार्य गरिएको हुँदा कारबाही गरिएको हो।

जसअन्तर्गत कारबाही पर्नेमा १२ जना सई,६ सहायक निरीक्षक (असई) , ९ जना वरिष्ठ हवल्दार, ५ जना हवल्दार,१० सहायक हवल्दार ,१ सय २१ सशस्त्र प्रहरी जवान र ३ जना परिचर रहेको सशस्त्र प्रहरी प्रधान कार्यालयले जनाएको छ। 

कारबाहीमध्ये १ सय १८ जनालाई नसिहतसहित कारबाही र बाँकिलाई बढुवा रोक्का, सचेत र चेतावनीसमेत दिइएको सशस्त्र प्रहरीले जानकारी दिएको छ।साथै सशस्त्र प्रहरी प्रधान कार्यालयले चैत २८ गते नै सम्बन्धित कार्यालयमा पत्राचार गर्दै नियमविपरीत कार्य गर्ने ४ जना सशस्त्र प्रहरी कर्मचारीलाई कारबाहीको प्रक्रिया अगाडि बढाउन निर्देशन दिएको थियो।

कारबाहीको प्रक्रियामा रहेकाहरुमा एक प्रहरी सहायक हवल्दार र ३ जना जवान रहेको सशस्त्र प्रहरीले जानकारी दिएको छ।