कर्णालीमा बेपत्ता भएका दुई किशोरको खोजीका लागि सशस्त्र प्रहरीको गोताखोर परिचलान

सुर्खेत । कर्णाली नदीमा बेपत्ता दुई किशोरको खोजतलासमा सशस्त्र प्रहरीको गोताखोरको टोली परिचालन भएको छ। 

शुक्रबार कालीकोटको पचालझरना गाउँपालिका-८ स्थित कर्णाली नदीमा नुहाउन गएका कालीकोटकै नरहरी गाउँपालिका-१ कोटवारीका १६ वर्षीय बिराज विष्ट डुबेर बेपत्ता भएका थिए भने शुक्रबार नै  दैलेखको चामुण्डविन्दासैनी नगरपालिका–९ स्थित कर्णाली नदीमा १६ वर्षीय भुवन सार्की बेपत्ता भएका हुन् ।

ती दुवै किशोरको खोजीका लागि आज गोताखोर परिचालन गरिएको सशस्त्र प्रहरी प्रधान कार्यालयले जानकारी दिएको छ। 

बिराजको खोजीका लागि सशस्त्र प्रहरी बल नेपाल नं. ६ महेश्वरी बाहिनी मुख्यालय सुर्खेतबाट  ५ जना गोताखोरसहितको टोली खटिएको छ भने भुवनको खोजीका लागि सशस्त्र प्रहरी बल नेपाल जलविद्युत आयोजना सुरक्षा बेस डावबाट सुरक्षाकर्मी खटाइएको सशस्त्र प्रहरीले जानकारी दिएको छ।

शुक्रबार साँझसम्म खोजी गर्दा उनीहरु नभेटिएपछि आज बिहानदेखि पुनः खोजी सुरू गरिएको सशस्त्र प्रहरी प्रधान कार्यालयले जनाएको च।