सगरमाथा आरोहण गरेर फर्केका सशस्त्रका असई दन्त सईमा बढुवा, आईजीपीले लगाइदिए दर्ज्यानी चिन्ह

काठमाडौं । सगरमाथा सम्वादको सन्देशसहित विश्वको सर्वोच्च शिखर सगरमाथाको सफल आरोहण गरी फिर्ता भएका सशस्त्र प्रहरी सहायक निरीक्षक (असई) दन्त बहादुर छत्याल एक तह बढुवा भएका छन् ।

सगरमाथाको सफल आरोहण गरी साहसिक कार्य गरेवापत सशस्त्र प्रहरी बल नेपालले उनलाई  असईबाट सशस्त्र प्रहरी नायव निरीक्षक (सई) मा  बढुवा गरेको हो। सशस्त्र प्रहरी महानिरीक्षक (आईजीपी) राजु अर्यालले आज  सईमा बढुवा भएका छत्याललाई दर्ज्यानी चिन्ह प्रदान गर्दै  सगरमाथा सफल आरोहणको हार्दिक बधाई समेत दिएका हुन् ।

अर्यालले सशस्त्र प्रहरी कर्मचारीहरुले सगरमाथा आरोहण गर्नसक्छु भन्ने भावना लिई साहसिक कार्यगर्दा सबैमा हौसला मिल्ने चर्चा गर्दै सगरमाथा आरोहण गर्ने व्यक्तिको मात्र नभई देश र संगठनको नाम समेत उच्च रहने बताए।

आईजीपी अर्यालले सगरमाथा लगायतका हिमालहरु आरोहण गर्ने आट, साहस र हौसला सबैमा प्रदान होस भन्ने विश्वास प्रकट गर्दै आगामी बर्षदेखि सशस्त्र प्रहरी बल नेपालका सबै प्रदेश कार्यालयहरुमा हिमाल आरोहण गर्ने अभियान नै शुरु गर्ने बताएका छन्  ।

यही जेठ ४ गते  बिहान ९ः२० बजे दन्तबहादुरले सगरमाथाको चुचुरोमा ‘सगरमाथा सम्वाद’ र सशस्त्र प्रहरी बल नेपालको झण्डा फहराएका थिए । दन्तबहादुर  सगरमाथा आरोहण लागि बैशाख १५ गते त्यसतर्फ प्रस्थान गरेका थिए ।