४७ ग्राम ब्राउन सुगरसहित दुई युवक विमानस्थल बाहिरबाट सशस्त्र प्रहरीको नियन्त्रणमा

काठमाडौं । सशस्त्र प्रहरीले त्रिभुवन अन्तर्राष्ट्रिय विमानस्थलको गेट नजिकै रहेको होटलबाट ४७ ग्राम ९ मिलिग्राम ब्राउनसुगरसहित दुई  जनालाई नियन्त्रणमा लिएको छ ।

नियन्त्रणमा लिइएकाहरुमा सिरहाको सिरहा नगरपालिका–८ का ४० वर्षिय मोहम्मद अक्टर मिँया र धनुषाको कमला नगरपालिका–८ का ४२ वर्षिय सामन यादव  रहेको सशस्त्र प्रहरी प्रधान कार्यालयले जानकारी दिएको छ।

उनीहरुलाई सशस्त्र प्रहरी बलको ईन्टेलिजेन्स व्युरोको विशेष सूचना आधारमा आज सोही ठाउँमा रहेको दर्शन नमस्ते ईन होटलबाट उक्त परिमाणको ब्राउन सुगरसहित नियन्त्रणमा लिइएको हो । साथै उनीहरुको साथबाट ब्राउन सुगर जोख्न प्रयोग हुने एक थान तराजु, मोवाइल ३ थान, पासपोर्ट २ थान, नागरिकता १ थान र नगद १२ हजार १ सय ७५ रुपैयाँ समेत बरामद भएको सशस्त्र प्रहरीले जनाएको छ।

उनीहरुले विगत लामो समयदेखि धनुषाको विभिन्न स्थानबाट लागुऔषध ल्याई काठमाडौमा बेचविखन गर्दै आएको पाइएको सशस्त्र प्रहरी प्रधान कार्यालयले जानकारी दिएको छ।

नियन्त्रणमा लिइएका दुवै जनासहित  बरामद गरिएको ब्राउनसुगरलाई आवश्यक कारवाहीको लागि सम्बन्धित निकायमा बुझाउने प्रक्रियामा रहेको सशस्त्र प्रहरी प्रधान कार्यालयले जनाएको छ।