स्कार्पियोमा ल्याइएको ठुलो परिमाणमा प्रतिवन्धित औषधिसहित ४ भारतीय नागरिक सशस्त्र प्रहरीको नियन्त्रणमा

काठमाडौं । सशस्त्र प्रहरीले ठुलो परिमाणमा  स्कार्पियोमा ल्याइँदै गरेको प्रतिवन्धित औषधिसहित ४ जना भारतीय नागरिकहरुलाई पक्राउ गरेको छ। 

मकवानपुरको इन्द्रसरोवर गाउँपालिका–२ हेवी चोकबाट गए राति सशस्त्र प्रहरीले भारत घर बताउने ४३ वर्षिय शेख सपुर, १९ वर्षिय निसाव आलम, २५ वर्षिय ओसिम अहमद र २४ वर्षिय शेख गजुरलाई ठुलो परिमाणमा प्रतिवन्धित औषधिसहित सशस्त्र प्रहरी बल नेपाल विपद् व्यवस्थापन बेश कुलेखानीबाट सशस्त्र प्रहरी निरीक्षक अमृत थापाको कमाण्डमा खटिएको टोलीले पक्राउ गरेको हो।

सशस्त्र प्रहरी प्रधान कार्यालयका अनुसार  भारतको सुगौलीबाट पर्साको वीरगन्ज हुँदै  काठमाडौतर्फ आउँदै गरेको बीआर ०५ पीए ९०९३ नम्बरको भारतीय स्कार्पियोको तीन वटा ढोकामा फल्स बटम बनाई ल्याउँदै गरेको प्रतिवन्धित औषधि  नोफिन २ हजार ४ सय थान, डाईजेपाम २ हजार ४ थान, प्रोमेथाईजन हाईड्रोक्लोराईट २ हजार ४ सय थान र ट्रमाडोल हाईड्रोक्लाराईड क्याप्सुल ५ थानसहित उनीहरुलाई पक्राउ गरेको हो।

पक्राउ परेकामध्ये २४ वर्षिय शेख गजुर स्कार्पियोका चालक रहेका छन् । सशस्त्र प्रहरीले  बरामद गरेको प्रतिवन्धित औषधि , स्कार्पियो र पक्राउ परेका ४ जनालाई आवश्यक कारवाहीको लागि इलाका प्रहरी कार्यालय भिमफेदीमा बुझाइएको सशस्त्र प्रहरी ल्रधान कार्यालयले जानकारी दिएको छ।