सशस्त्र प्रहरीद्वारा कपिलवस्तुबाट ४ करोड ९२ लाख बढीको अवैध सामग्री बरामद

सौरभ गिरी/ काठमाडौं । सशस्त्र प्रहरी बलले कपिलवस्तुबाट झण्डै ५ करोड रुपैयाँ बराबरको भन्सार छली गरी ल्याइएको अवैध सामग्री बरामद गरेको छ।

सशस्त्र प्रहरी बल नं.२८ गण कपिलबस्तुका अनुसार आर्थिक वर्ष २०८१-०८२ मा  ४ करोड ९२ लाख २० हजार ७०६ रुपैयाँ बराबरको अवैध भन्सार छलीका सामग्री बरामद गरेको हो। गत साउनदेखि असार मसान्तसम्ममा कपिलवस्तुभरबाट गण र मातहतका सशस्त्र प्रहरी कार्यालयले बरामद गरेको  सशस्त्र प्रहरी बल नं.२८ गणले जानकारी दिएको छ। सशस्त्र प्रहरी कपिलवस्तुका अनुसार आ.व. ०८१-०८२ मा बरामद गरिएको सामग्री ८४.०६ प्रतिशत रहेको छ भने आ.व.०८०-०८१ मा बरामद गरिएको अवैध बस्तुको मूल्य २ करोड ६७ लाख ४१ हजार १७५ रुपैयाँ रहेको थियो।

उक्त अवधिमा सशस्त्र प्रहरीले  कपिलवस्तुबाट १ करोड ६९ लाख ५ हजार ३६४ रुपैयाँको किराना सामग्री बरामद गर्दा ७६ लाख ७५ हजार ६२६ रुपैयाँ बराबरको अवैध लत्ताकपडा बरामद गरिएको हो। आ.व.०८१-०८२ मा ३१ लाख ४९ हजार ३५० रुपैयाँको पशुजन्य अवैध बस्तु बरामद गरिएको सशस्त्र प्रहरी बल कपिलवस्तुले जनाएको छ।

त्यसैगरी २ करोड १४ लाख ९० हजार ३६६ रुपैयाँ बराबर मूल्यका अवैध ओसारपसारमा प्रयोग गरिएका र बिलबिजक बिना अवैध सामग्री ढुवानी गरेका सवारीसाधन नियन्त्रणमा लिइएको सशस्त्र प्रहरीले जानकारी दिएको छ।

त्यस दौरानमा सशस्त्र प्रहरीले कपिलवस्तुबाट ४ जनालाई ५.४० ग्राम ब्राउन सुगर र प्रतिवन्धित औषधिसहित  नियन्त्रणमा लिएको सशस्त्र प्रहरी बल नं.२८ गण कपिलवस्तुका एसपी नेत्र केसीले जानकारी दिएका छन् ।

यस्तै सशस्त्र प्रहरीले नेपालबाट भारत प्रवेश गर्ने क्रममा दुई जना  चिनियाँ नागरिक र सीमा नाकाबाट मानव बेचबिखनमा परेका एक जनाको उद्धार गर्दा उक्त कार्यमा संलग्न रहेको आरोपमा एक जनालाई पक्राउ गरेर कपिलवस्तु प्रहरीलाई बुझाएको एसपी केसीले बताए।