सशस्त्र प्रहरीले भन्यो-आपराधिक गतिविधि कतै भएको देखिएमा तत्काल खबर गर्नुहोला

काठमाडौं । सशस्त्र प्रहरी प्रधान कार्यालयले सीमा अपराध लगायत लुटपाट, आगजनी जस्ता कार्यमा संलग्न भई आपराधिक गतिविधि संचालन गर्न सक्ने हुँदा त्यस्ता व्यक्ति तथा आपराधिक गतिविधिहरु कहीं कतै भएको देखिएमा तत्काल सशस्त्र प्रहरी बललाई खबर गर्न आग्रह गरेको छ। 

साथै राष्ट्रमा शान्ति र सु-व्यवस्था कायम गरी जनताको जीउ, धन र स्वतन्त्रताको संरक्षण गर्न जुनसुकै विषम् परिस्थितिमा पनि सशस्त्र प्रहरी बल, नेपाल देश र जनताको सेवामा प्रतिवद्ध रही पूर्णरुपमा संयमताका साथ परिचालन भइरहेको जनाएको छ।

सशस्त्र प्रहरी प्रधान कार्यालयले भनेको छ-"राज्यद्वारा सुम्पिएको मुख्य कार्यदिश अन्तर्गत रहेको सीमा सुरक्षामा सशस्त्र प्रहरी बल, नेपाल आफ्नो जिम्मेवारीबाट विचलित नभई अन्तर्राष्ट्रिय सीमामा खटिएका समकक्षी लगायत सरोकारवाला अन्य निकायहरुसँगको समन्वयमा सीमाबाट हुनसक्ने कुनै पनि किसिमको सीमा अपराध, घुसपैठ तथा अतिक्रमण जस्ता कार्यहरु नियन्त्रण गर्न पूर्णरुपमा कटिवद्ध रही प्रभावकारी रुपमा परिचालन हुँदै आइरहेको छ ।"

हालैको विषम् परिस्थितिबाट सामान्यकरण हुँदै आउने क्रममा केही व्यक्ति वा समूहहरुले विभिन्न संचार माध्यम तथा सामाजिक सञ्जालबाट तथ्यहीन भ्रामक प्रचार प्रसार गर्ने र परिस्थितिको अनुचित फाइदा उठाई सीमा अपराध लगायत लुटपाट, आगजनी जस्ता कार्यमा संलग्न भई आपराधिक गतिविधि संचालन गर्न सक्ने हुँदा यस्ता व्यक्ति तथा आपराधिक गतिविधिहरु कहीं कतै भएको देखिएमा वा पाइएमा सशस्त्र प्रहरी बल, नेपालको टोल फ्रि नं. १११४ वा अन्य सुरक्षा निकायहरुमा तुरुन्त जानकारी गराई सहयोग गर्न सम्बन्धित सबैमा सशस्त्र प्रहरीले अनुरोध गरेको हो।