अवैध हतियारविरुद्ध सशस्त्र प्रहरीको कारबाही: दुईवटा अटोमेटिक पेस्तोलसहित युवक पक्राउ

रौतहट । सशस्त्र प्रहरी अवैध हतियारविरुद्ध गरेको कारबाहीमा रौतहटको चन्द्रपुर नगरपालिका–४ देउराली चोकमा सशस्त्र प्रहरीले अवैध हतियारसहित एक युवकलाई नियन्त्रणमा लिएको छ।

सशस्त्र प्रहरीको इन्टेलिजेन्स ब्यूरोबाट खटिएको टोलीले बाराको निजगढ–६ स्थायी घर भई हाल हेटौंडा–१३ पदमपोखरी बस्ने २२ वर्षिय सुमन आचार्यलाई शनिबार साँझ  दुई वटा अटोमेटिक पेस्तोलसहित पक्राउ गरेको हो।

उक्त युवकको साथबाट बेरेटा मेड इन इटाली र सिएफ ९८९(०००१६९०८२६६) लिखित दुईवटा अटोमेटिक पेस्तोल, दुईवटा म्याग्जिन, १३ राउण्ड गोली तथा एक थान खुकुरी समेत बरामद गरिएको सशस्त्र प्रहरीले जनाएको छ।

पक्राउ परेका आचार्यलाई बरामद हतियार र सामग्रीसहित आवश्यक कारबाहीका लागि सम्बन्धित निकायमा बुझाइएको सशस्त्र प्रहरीले जानकारी दिएको छ।