नेपाल-भारत सीमा हुँदै लागुऔषध तस्करीको प्रयास विफल, ३५ वर्षीय युवक सशस्त्र प्रहरीको नियन्त्रणमा

मधेस  । मधेस प्रदेशमा लागुऔषध नियन्त्रणलाई प्रभावकारी बनाउन सशस्त्र प्रहरीका डीआईजी कृष्ण ढकालले दिएको कडा निर्देशन अनुसार सशस्त्र प्रहरीले त्यसविरुद्ध कडाई गर्दै आएको छ।

जसअन्तर्गत सशस्त्र प्रहरीले  महोत्तरीको मटिहानी नगरपालिका–८ स्थित नेपाल–भारत सीमा क्षेत्रबाट विभिन्न किसिमका लागुऔषधसहित सशस्त्र प्रहरीले भारतीय युवकलाई आज बिहान नियन्त्रणमा लिएको हो।

सशस्त्र प्रहरीका अनुसार विभिन्न किसिमका लागुऔषध लिएर आउँदै गरेका भारतको मधुवनी, ग्रामपञ्चायत–२ का ३५ वर्षीय विनोद साहलाई नाइट्रोजेपाम ट्याब्लेट ३ हजार २ सय ९८ पिस, डाईजेपाम ईन्जेक्सन २ सय ९९ पिस, फेनेरागन ईन्जेक्सन ३ सय पिस, बुप्रेनोफिन ईन्जेक्सन २ सय ७४ पिस रखैरो  हेरोइन ६ सय ५० मिलीग्रामसहित पक्राउ गरिएको हो। उनको साथबाट सशस्त्र प्रहरीले एक थान मोबाइल र ३ हजार ५ सय ३५ नेपाली रुपैयाँ समेत बरामद गरेको छ।

सशस्त्र प्रहरी बल नेपाल, बोर्डर आउट पोस्ट मटिहानीबाट खटिएको गस्ती टोलीले विनोदलाई शंकास्पद अवस्थामा देखिएपछि चेकजाँच गर्ने क्रममा उक्त परिमाण बराबरको लागुऔषध फेला पारिएको हो। पक्राउ परेका विनोदलाई बरामद गरिएका लागुऔषधसहित आबश्यक कारबाहीका लागि नेपाल प्रहरीलाई बुझाइएको सशस्त्र प्रहरीले जनाएको छ।

सीमाक्षेत्र हुँदै दिनप्रतिदिन बढ्दै गएको अवैध लागूऔषध आपूर्तिलाई रोक्न सशस्त्र प्रहरीले गरेको यस्तो कडाइलाई निरन्तरता जारी राख्ने डीआईजी ढकालले बताएका छन् । स्थानीयवासीले पनि सीमा क्षेत्रमा सुरक्षाको उपस्थिति र निगरानी स्तर बढ्दो रुपमा कडा भएको महसुस गरेको बताउँदै सशस्त्र प्रहरीको सक्रियताप्रति सकारात्मक प्रतिक्रिया दिएका छन्।