सीमा सुरक्षामा जमुनाह गुल्मको ‘अग्रपंक्ति’ भूमिका, तस्करी नियन्त्रणमा उल्लेखनीय सफलता

अनिल गौतम/बाँके। बाँकेको नेपालगन्जस्थित सशस्त्र प्रहरी बलको सीमा सुरक्षा गुल्म जमुनाहले  अवैध ओसारपसार तथा सीमा अपराध नियन्त्रणमा उल्लेखनीय सफलता हात पारेको छ। अवैध तस्करी तथा लागुऔषध नियन्त्रणदेखि सीमाबाट हुने विभिन्न अवैध गतिविधिमा संलग्न व्यक्तिहरूलाई पक्राउ गर्ने कार्यमा गुल्म सक्रिय रूपमा अघि बढ्दै आएको छ। सो अवधिमा गुल्मले लागुऔषध ब्राउन सुगर लगायत प्रतिवन्धित औषधिसहित कारोबारमा संलग्न भएकाहरुलाई नियन्त्रणमा लिएर आवश्यक कारबाहीका लागि सम्बन्धित निकायमा बुझाइसकेको छ।

सशस्त्र प्रहरी बलकै एक अब्बल अधिकृतका रुपमा चिनिने सीमा सुरक्षा गुल्म जमुनाहका इन्चार्ज डीएसपी युवराज खड्काको नेतृत्वले पछिल्लो ४ महिनामा अवैध रूपमा तस्करी गर्ने गिरोहलाई धरासायी बनाउन सफल बन्दै झण्डै पौने ३ करोड रुपैयाँभन्दा बढी मूल्य बराबरका अवैध सामग्री बरामद गर्न सक्षम भएको छ।

बाँके जिल्लामा अवैध ओसारपसारविरुद्ध सशस्त्र प्रहरीको परिचय मजबुत बनाउने काममा सीमा सुरक्षा गुल्म जमुनाह अग्रसर रहेको पाइएको छ।

सीमावर्ती बस्तीमा समय–समयमा सचेतनामूलक कार्यक्रम सञ्चालन गर्दै आएको जमुनाह गुल्मले राजस्व वृद्धि सम्बन्धी जनचेतना अभियान समेत चलाइरहेको छ। जमुनाह गुल्मबाट एकल गस्ती, भारतीय सशस्त्र सीमा बल (एसएसबी) सँग संयुक्त गस्ती, सीमा स्तम्भ सुरक्षा तथा अवैध आवागमन , घुसपैठ रोकथाम,मानव बेचबिखन नियन्त्रण र अवैध ओसारपसार लगायतका अवैध गतिविधिविरुद्ध  निरन्तर निगरानीजस्ता गतिविधि प्रभावकारी रूपमा सञ्चालन हुँदै आएका छन्।

डीएसपी खड्का र गुल्ममा कार्यरत सम्पूर्ण सशस्त्र प्रहरी कर्मचारीहरूको अथक मेहनत र संगठनले दिएको जिम्मेवारीलाई कुशलतापूर्वक निभाउन गरिएको प्रयासले सीमा सुरक्षामा थप विश्वास जगाएको छ। जमुनाह सीमा क्षेत्रमा पछिल्लो समय सीमा सुरक्षा गुल्मको सक्रियताले अवैध गतिविधि नियन्त्रणमा उल्लेखनीय योगदान दिएको स्थानीयहरू बताउँछन्।