शम्शेरगञ्जस्थित सशस्त्र प्रहरीको गोताखोरले २३ फिट गहिराइबाट निकाल्यो १२ वर्षीय बालकको शव

बर्दिया। मधुवन नगरपालिका–१ स्थित खौरहवा खोलामा पौडी खेल्ने क्रममा डुबेर बेपत्ता भएका १२ वर्षीय बालक बसन्त रानाभाटको शव चार दिनपछि फेला परेको छ। बढैयाताल गाउँपालिका–७ घर भएका पूर्णबहादुर रानाभाटका छोरा बसन्त मंसिर २३ गतेदेखि बेपत्ता भएका थिए।

बेपत्ता बालकको खोजतलासका क्रममा सशस्त्र प्रहरी बल नं–४२ रिजर्भ गण शम्शेरगञ्जबाट खटिएको गोताखोरको टोलीले आज दिउँसो शव फेला पारेको सशस्त्र प्रहरीले  जानकारी दिएको छ।

बसन्तको शवलाई शम्शेरगञ्जबाट खटिएका सशस्त्र प्रहरीका गोताखोर सहायक हवल्दार मोहन बिष्ट र विशाल वलीको टोलीले खोलाको झण्डै २३ फिट गहिराइमा निकाल्न सफल भएको सशस्त्र प्रहरी बल नं.३१ गण बर्दिया प्रहरीले जनाएको छ।

जिल्ला प्रहरी कार्यालय बर्दियाले घटनाबारे थप अनुसन्धान अगाडि बढाएको जानकारी दिएको छ।