दुम्सी मार्न प्वालमा छिरेका दिलिप रेग्मी प्वालमै अड्किएपछि........!

काठमाडौं । दुम्सी मार्ने क्रममा प्वामा अड्किएका पुरुषको सशस्त्र प्रहरीसहित संयुक्त सुरक्षा फौजले  सकुशल उद्धार गरेको छ ।

दुम्सीको प्वालमा अड्किएका ५० वर्षीय दिलिप रेग्मीको सकुशल उद्धार गरिएको सशस्त्र प्रहरी प्रधान कार्यालयले जानकारी दिएको छ।

सशस्त्र प्रहरीका अनुसार सप्तरीको कन्चनरुप नगरपालिका–११ स्थित बक्साका ५० वर्षिय दिलिप रेग्मी दुम्सी मार्न प्वालमा छिर्ने क्रममा अड्किएका थिए।

रेग्मी प्वालमा अड्किए लगत्तै उनीसँगै गएका साथीहरुले घटनाबारे जानकारी गराए पश्चात सशस्त्र प्रहरी बल नेपाल सुरक्षा वेश भारदह र सितापुरबाट विपद् व्यवस्थापन तालिम प्राप्त सुरक्षा फौजसहित नेपाल प्रहरीको संयुक्त टोलीले ५ घण्टादेखि जमिन मुनि फसेका रेग्मीलाई करीव २० मिटर भित्रबाट सकुशल उद्धार गरेको सशस्त्र प्रहरी प्रधान कार्यालयले जनाएको छ।

दुम्सीको प्वालबाट उद्धार पश्चात रेग्मीलाई उपचारको लागि धर्मेश्वर अस्पताल ठेलियातर्फ पठाएको सशस्त्र प्रहरीले जानकारी दिएको छ। सशस्त्र प्रहरीका अनुसार उनी पहिले देखिनै दुम्सीको शिकार गर्दै आईरहेको बुझिएको छ ।