बिलबिजक बिनाका चाइनीज किराना सामानसहित गाडी र चालक सशस्त्र प्रहरीको नियन्त्रणमा

काठमाडौं । बिलविजक तथा भन्सार प्रज्ञापन पत्र नभएको लाखौं रुपैयाँको चाईनिज किराना सामानसहित सशस्त्र प्रहरीले गाडी र चालकलाई नियन्त्रणमा लिएको छ।

सशस्त्र प्रहरी प्रधान कार्यालयका अनुसार सिन्धुपाल्चोकको बाह्रविसे नगरपालिका–४ स्थित बाह्रबिसे बजारबाट  बाह्रविसे नगरपालिका–६ बस्ने शिवलाल तामाङ्गलाई सशस्त्र प्रहरी सुरक्षा वेश लामोसाँघुबाट खटिएको टोलीले गए राति उक्त गाडीको सहितको सामानलाई नियन्त्रणमा लिएको हो ।

तातोपानीबाट खाडिचौरतर्फ जाँदै  गरेको बा ४ ख ५८६४ नम्बरको आइसर गाडीमा राझेर ल्याउँदै गरेको सामानको बिजलविजक तथा भन्सार प्रज्ञापन पत्र समेत फेला नपरेपछि सो गाडीका चालक तामाङ्गलाई समेत नियन्त्रणमा लिएको सशस्त्र प्रहरी प्रधान कार्यालयले जनाएको छ।

बरामद गरिएका सामानहरुमा स्टेशनरी, खेलकुद तथा किराना लगायतका रहेका छन् । बरामद सामानको अन्दाजी मुल्य ७ लाख २२ हजार १० रुपैयाँ र गाडीको १५ लाख मुल्यसहित जम्मा मुल्य २२ लाख २२ हजार १० रुपैयाँ रहेको बताइएको छ।

पक्राउ परेका तामाङ्गसहित बरामद सामान तथा गाडीलाई आवश्यक कारवाहीको लागि तातोपानी भन्सार कार्यालय सिन्धुपाल्चोकमा बुझाउने प्रक्रियामा रहेको सशस्त्र प्रहरी प्रधान कार्यालयले जानकारी दिएको छ।