हराएका ४ बालबालिकाको सशस्त्र प्रहरीद्वारा सकुशल उद्धार

काठमाडौं । आइतबारदेखि हराएका चार बालबालिकालाई सशस्त्र प्रहरीले फेला पारेर सकुशल उद्धार गरेको छ। सप्तरीको तिरहुत गाउँपालिका–३ का गोईठी बस्ने ती बालबालिकाहरुलाई सशस्त्र प्रहरी बल नेपाल, सुरक्षा बेश भारदहको टोलीले  आज बिहान हनुमाननगर कंकालिनीमाई नगरपालिका–१, कोशी व्यारेज नजिक अलपत्र अवस्थामा भेटेको हो।

सशस्त्र प्रहरीक  अनुसार फेला परेकाहरूमा ७ वर्षिया श्रृष्टि कुमारी सरदार, ७ वर्षिया कुमारी सरदार, ८ वर्षिया आरोसी सरदार र ६ वर्षिय कृष्ण सरदार रहेका छन्।

सशस्त्र प्रहरीले बालबालिकालाई शंका लागेर सोधपुछ गर्दा उनीहरूले घरको ठेगाना र हिडेको कारण स्पष्ट भन्न नसके पाइएपछि नेपाल प्रहरीको जिम्मा लगाइएको हो। प्रारम्भिक अनुसन्धानमा बालबालिकाहरू आफैँ घरबाट हिँडेका हुन् र कसैले ललाई फकाई ल्याएको हुन सक्ने अनुमान गरिएको छ।

फेला परेका बालबालिकाहरूलाई नेपाल प्रहरीले  स्थानीय जनप्रतिनिधिको रोहबरमा अभिभावकको जिम्मा लगाई सुरक्षित रुपमा फिर्ता पठाएको सशस्त्र प्रहरीले जानकारी दिएको छ।