३७ लाख रुपैयाँ बढीको तस्करीको अवैध लत्ताकपडा सशस्त्र प्रहरीको नियन्त्रणमा

रुपन्देही। सशस्त्र प्रहरी बलले रुपन्देहीमा ठूलो परिमाणको अवैध लत्ताकपडा बरामद गरेको छ।

सशस्त्र प्रहरीले  शनिबार  रुपन्देहीको सैनामैना नगरपालिका–९, बासगढीस्थित कच्ची सडक छेउको झाडीमा लुकाईछिपाई राखिएको अवैध लत्ताकपडा बरामद गरेको हो।

बरामद गरिएका विभिन्न किसिमका लत्ताकपडाको मूल्य ३७ लाख २५ हजार २ सय रुपैयाँ बराबर रहेको सशस्त्र प्रहरीले जनाएको छ। ती लत्ताकपडाहरू भारतबाट अवैध रूपमा भित्र्याएर लुकाइराखिएको अवस्थामा फेला परेको सशस्त्र प्रहरीको भनाइ छ।

बरामद गरिएको सम्पूर्ण अवैध लत्ताकपडालाई आजै आवश्यक कारबाहीका लागि रुपन्देही भन्सार कार्यालयमा बुझाउने तयारी गरिएको सशस्त्र प्रहरीले जानकारी दिएको छ।