सशस्त्र प्रहरीमा बिदा र रवाना स्थगित, राजीनामा स्वीकृत नगर्न आदेश

फागुन । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै सशस्त्र प्रहरी बलले आफ्ना जनशक्तिलाई पूर्ण रूपमा निर्वाचन सुरक्षामा केन्द्रित गर्ने तयारी थालेको छ।

यही उद्देश्यले निर्वाचन सम्पन्न नहुँदासम्म राजीनामा स्वीकृति, सरुवा भइसकेकालाई रवाना दिने तथा बिदा स्वीकृत गर्ने प्रक्रिया अस्थायी रूपमा रोकिएको सशस्त्र प्रहरी प्रधान कार्यालयले जानकारी दिएको छ।

सशस्त्र प्रहरी बल प्रधान कार्यालयले देशभरका सबै युनिटहरूलाई परिपत्र जारी गर्दै निर्वाचनअघि कुनै पनि किसिमको राजीनामा स्वीकृत नगर्न आदेश दिएको हो। साथै, सरुवा भएका सुरक्षाकर्मीलाई पनि तत्काल रवाना नदिने निर्णय गरिएको छ।

सशस्त्र प्रहरी बलका सह–प्रवक्ता डीएसपी शैलेन्द्र थापाका अनुसार निर्वाचनको संवेदनशीलतालाई ध्यानमा राख्दै यो निर्णय लिइएको हो। “निर्वाचन सुरक्षा प्रभावकारी बनाउन आवश्यक जनशक्ति यथास्थानमै राख्नुपर्ने भएकाले यस्तो व्यवस्था गरिएको हो,” उनले बताए।

एकीकृत सुरक्षा योजनाअनुसार सशस्त्र प्रहरीले निर्वाचन अवधिभर आफ्नो जनशक्ति परिचालन गर्ने रणनीति तय गरिसकेको छ। मतदान केन्द्र, मतपेटिका ढुवानी तथा संवेदनशील क्षेत्रको सुरक्षालाई प्राथमिकतामा राखेर तयारी अघि बढाइएको सशस्त्र प्रहरी बलले जनाएको छ।

आगामी फागुन २१ गते देशभर हुने प्रतिनिधिसभा सदस्य निर्वाचनलाई स्वतन्त्र, निष्पक्ष र सुरक्षित वातावरणमा सम्पन्न गराउने लक्ष्यसहित सुरक्षा निकायहरू आ–आफ्नो भूमिकामा केन्द्रित भएका छन्।