बाँकेमा निर्वाचन सुरक्षा सुदृढ गर्न सशस्त्र प्रहरीका एआईजी दाहालको निर्देशन

नेपालगञ्ज । सशस्त्र प्रहरीका एआईजी बंशीराज दाहालले बाँकेको निर्वाचन सुरक्षाबारे जानकारी लिएका छन् । फागुन २१ गते हुने आसन्न प्रतिनिधि सभा सदस्य निर्वाचनलाई लक्षित गर्दै सशस्त्र प्रहरी बल नेपाल प्रधान कार्यालय सीमा सुरक्षा बिभाग हलचोक काठमाण्डौबाट अनुगमन तथा सुपरिबेक्षणको लागि शुक्रबार आएका बिभागीय प्रमुख  एआईजी दाहालले जिल्लाको निर्वाचन सुरक्षाबारे जानकारी लिएका हुन् । 

बाँके जिल्लास्थित सशस्त्र प्रहरी बल नेपाल नम्बर ३० गण हेडक्वार्टर बागेश्वरीमा दाहालले जिल्लास्थित बिभिन्‍न युनिटहरुका कमाण्डर तथा कार्यरत सशस्त्र प्रहरी कर्मचारीहरु र सशस्त्र प्रहरी बलतर्फ भर्ना भएका निर्वाचन प्रहरीहरुलाई आवश्यक निर्देशन समेत दिएका छन् । 

एआईजी दाहालले निर्वाचन सुरक्षाको अवस्था तथा चुनौतीहरुको बारेमा जानकारी गराई निर्वाचनको समयमा आई पर्न सक्ने चुनौतीहरुलाई समाधान गर्न र उचित परिचालनको सम्बन्धमा आवश्यक निर्देशन दिएका थिए । 

 जिल्लामा रहेका बिभिन्‍न युनिट कमाण्डरहरुले निर्वाचन लक्षित आ-आफ्नो क्षेत्रको सुरक्षा अवस्थाको बारेमा जानकारी गराएका थिए । त्यस क्रममा नम्बर ३० गण हेडक्वार्टर बागेश्वरी गणका गणपति एसपी भिम बहादुर चन्दले सम्पूर्ण जिल्लाको सुरक्षा अवस्था तथा निर्वाचनमा सशस्त्र प्रहरी बलको तैनाथी र सुरक्षा चुनौतीहरुको बारेमा जानकारी गराएका थिए । 

भर्खरै सरुवा भएर आएका एसपी चन्दले सीमा नाकामा कडाई गर्दै तस्करी नियन्त्रणमा तदारुकता देखाएका छन् । निर्वाचन सुरक्षामा पनि उनले  निगरानी बढाएका छन् ।

त्यस अवसरमा एआईजी दाहालले जिल्ला सुरक्षा समितिका पदाधिकारीहरुसंग अन्तक्रियात्मक भेटघाट गर्दै निर्वाचन सम्बन्धि जिल्लाको समग्र सुरक्षा अवस्थाको बारेमा समेत जानकारी लिएका थिए ।