नेपालगन्जबाट १० लाखको अवैध सामग्री सशस्त्र प्रहरीको नियन्त्रणमा, सीमामा बढाइयो विशेष निगरानी

बाँके । सशस्त्र प्रहरीले नेपालगन्ज सीमा नाकाबाट भारतबाट अवैध रुपले भन्सार छलेर ल्याइएको लाखौं रुपैयाँ बढीको अवैध सामग्री बरामद गरेको छ।

सशस्त्र प्रहरीका अनुसार सीमा सुरक्षा गुल्म नेपालगन्जले आज बिहान  करिब १० लाख रुपैयाँ बराबरका विभिन्न किसिमका कपडा तथा पानी तान्ने मोटर पम्प र मोटर पार्टसहरू नियन्त्रणमा लिएको हो।

प्राप्त सूचनाका आधारमा सीमा क्षेत्रमा निगरानी बढाउँदै गरिएको विशेष जाँचका क्रममा उक्त सामग्री  अवैध रूपमा भित्र्याइएको अवस्थामा फेला परेको सशस्त्र प्रहरीले जनाएको छ। बरामद सामग्री आवश्यक कानुनी कारबाहीका लागि भोलि नेपालगन्ज भन्सार कार्यालयमा बुझाइने सशस्त्र प्रहरीले जनाएको छ।

यसैबीच, सशस्त्र प्रहरी बाँकेको कमाण्ड एसपी भिम बहादुर चन्दले सम्हालेयता सीमामा विशेष निगरानीलाई थप प्रभावकारी बनाइएको छ। साथै निर्वाचन सुरक्षालाई उच्च प्राथमिकतामा राख्दै सशस्त्र प्रहरी सक्रिय रूपमा खटिएको जनाइएको छ।

बाँके जिल्लाको आन्तरिक सुरक्षामा समेत तदारुकताका साथ सशस्त्र प्रहरीको परिचालन बढाइएको र शान्ति सुरक्षा कायम राख्न आवश्यक सबै उपाय अपनाइएको सशस्त्र प्रहरी स्रोतले जनाएको छ। सीमा क्षेत्र हुँदै हुने अवैध गतिविधि नियन्त्रण तथा समग्र सुरक्षा व्यवस्थापनलाई अझ सुदृढ बनाइएको बताइएको छ।