सशस्त्र प्रहरीद्वारा प्रतिबन्धित औषधिसहित स्कुटर बरामद, दुई जना पक्राउ

सिरहा। सशस्त्र प्रहरी बल, नेपालले सिरहाको सीमावर्ती क्षेत्रबाट प्रतिबन्धित लागूऔषध बरामद गर्दै दुई जनालाई पक्राउ गरेको छ।

आइतबार साँझ करिब ७ः३० बजे भगवानपुर गाउँपालिका–३ धातीस्थित सीमा इलाकामा सशस्त्र प्रहरी बलको चेकप्वाइन्टमा खटिएको टोलीले भारतबाट नेपालतर्फ आउँदै गरेको प्रदेश २–०२–००५ प ३३०६ नम्बरको स्कुटरलाई शंकाको आधारमा रोकी जाँच गरेको थियो। गुल्मबाट  खटिएको  टोलीले स्कुटर चालक लहान नगरपालिका–७ गणेशचोक बस्ने अन्दाजी ३३ वर्षीय लक्ष्मी साहलाई चेकजाँच गर्दा उनले खुट्टाको मोजाभित्र लुकाएर ल्याएको लागूऔषध फेला पारेको हो।

जाँचका क्रममा डाइजेपाम र बुप्रेनोर्फिन इन्जेक्सन २०–२० एम्पुल तथा नाइट्राजेपाम १० मिलिग्रामका १६ ट्याब्लेट बरामद गरिएको सशस्त्र प्रहरीले जनाएको छ। स्कुटर पछाडि सवार लहान नगरपालिका–१ निवासी अन्दाजी २२ वर्षीय रोमन चौधरीसमेत घटनामा संलग्न देखिएपछि दुवै जनालाई नियन्त्रणमा लिइएको हो।

उनीहरूको साथबाट प्रमेथाजिन हाइड्रोक्लोराइड इन्जेक्सन १९ एम्पुल, मनोसेफ ५०० मिलिग्राम, स्टेराइल वाटर, ५ एमएलका दुई थान सिरिन्ज, ६० पिस डिस्पोक्यान, उक्त स्कुटर, दुई थान एन्ड्रोइड मोबाइल, नगद रु. १ हजार ५८५ सहितको पर्स र इयरबड समेत बरामद गरिएको छ। पक्राउ परेका दुवै जनालाई आवश्यक अनुसन्धान तथा कारबाहीका लागि इलाका प्रहरी कार्यालय लहानमा बुझाइएको जनाइएको छ।

यसअघि मिति २०८२ माघ २३ गते राति करिब १०ः३० बजे सोही गाउँपालिका–३ अभयनगरस्थित सीमा इलाकाबाट सशस्त्र प्रहरीको टोलीए भारतबाट नेपालतर्फ आउँदै गरेको ना ५९ प ९३७५ नम्बरको मोटरसाइकल जाँच गर्दा मोटरसाइकलमा पछाडि सवार लहान नगरपालिका–१३ निवासी अन्दाजी १९ वर्षीय दिलिप कुमार शर्माको साथबाट १०.७६ ग्राम (प्लास्टिकसहित) ब्राउन सुगर बरामद गरेको थियो। मोटरसाइकल चालक अन्दाजी १८ वर्षीय रोशन कुमार यादवसमेत संलग्न देखिएपछि दुवै जनालाई नियन्त्रणमा लिई इलाका प्रहरी कार्यालय लहानमा बुझाइएको थियो।

सिरहास्थित सम्बन्धित गुल्मका इन्चार्ज डीएसपी नरेश कुमार खड्काको नेतृत्वमा सीमाक्षेत्रमा लागूऔषध नियन्त्रण अभियान तीव्र बनाइएको  छ।