३२ लाख रुपैयाँ बढीको अवैध सामग्री सशस्त्र प्रहरीको नियन्त्रणमा

काठमाडौं । सशस्त्र प्रहरे!को सक्रियतापछि भन्सार छली गरेर भित्र्याइने सामान नियन्त्रणमा पर्ने क्रम बढ्दै गएको छ। पछिल्लो कारबाहीमा सशस्त्र प्रहरीले करिब ३२ लाख ८३ हजार ७५० रुपैयाँ बराबरका अवैध सामग्रीसहित सवारी साधन नियन्त्रणमा लिएको जनाएको छ।

विशेष सूचनाका आधारमा खटिएको टोलीले भारतबाट अवैध रूपमा सामान ल्याइँदै गरेको अवस्थामा कारबाही गरेको हो। प्रस्तावित सीमा सुरक्षा गुल्म मलंगवाबाट सशस्त्र प्रहरी नायब उपरीक्षक लिला बहादुर कार्कीको नेतृत्वमा गएको टोलीले सर्लाहीको पर्सा–५ स्थित सिमानानजिकै मोटरसाइकलमार्फत ल्याइएका सामान दुई पिकअपमा सार्दै गरेको अवस्थामा फेला पारेको थियो।

बरामद सामग्रीमध्ये १ हजार ७८५ केजी भारतीय फूल रहेको छ, जसको अनुमानित मूल्य ७ लाख १४ हजार रुपैयाँ रहेको बताइएको छ। त्यसैगरी भन्सार छली गरी ल्याइएका कपडाको मूल्य करिब ८ लाख ८३ हजार ७५० रुपैयाँ आकलन गरिएको छ। नियन्त्रणमा लिइएका दुई पिकअप र चार मोटरसाइकलको अनुमानित मूल्य करिब २४ लाख रुपैयाँ बराबर रहेको प्रहरीले जनाएको छ।

बरामद गरिएका सबै सामान तथा सवारी साधन आवश्यक अनुसन्धान र कानुनी प्रक्रियाका लागि सर्लाही भन्सार कार्यालयमा बुझाइएको छ। सीमावर्ती क्षेत्रमा अवैध कारोबार नियन्त्रण गर्न सशस्त्र प्रहरीले निगरानी तथा गस्ती कडा बनाएको जनाएको छ।