जेनजी आन्दोलनमा भागेका चार जना ब्राउनसुगरसहित सशस्त्र प्रहरीको नियन्त्रणमा

काठमाडौं । जेनजी आन्दोलनका क्रममा फरार रहेका चार जनालाई सशस्त्र प्रहरीले नियन्त्रणमा लिएको छ।  सशस्त्र प्रहरीले आन्दोलनका क्रममा  सुनिल थापासहित भक्तपुर जिल्लाको मध्यपुरथिमी नगरपालिका–१ लोकन्थलीबाट चार जनालाई नियन्त्रणमा लिएको जनाएको छ।

सशस्त्र प्रहरीका अनुसार सुनसरीको धरान उपमहानगरपालिका–१३ बस्ने ३३ वर्षिय  थापा लागुऔषध कारोबार मुद्दामा कैदा भुक्तानी गरिरहेको र जेनजी आन्दोलमा क्रममा फरार भएका थिए । उनीसँगै लागुऔषध कारोबारमा संलग्न भक्तपुरको लोकन्थली घर बताउने ३३ वर्षीय आशिष पाण्डे, इमाडोल घर बताउने २१ वर्षीया राशि गौतम र काठमाडौंको नक्साल घर बताउने २१ वर्षीय युनिक पोखरेल समेतलाई नियन्त्रणमा लिइएको हो ।

उनीहरुलाई सशस्त्र प्रहरी बल नेपाल ईन्टेलिजेन्स व्यूरोको विशेष टोलीले आज दिउँसो साढे १२ बजे लोकन्थलीको एक गल्लीमा जस्ताको टहरामा डेरा गरी लागुऔषध कारोबार गरिरहेको भन्ने विशेष सूचनाको आधारमा नियन्त्रणमा लिएको सशस्त्र प्रहरी प्रधान कार्यालयले जानकारी दिएको छ।

सशस्त्र प्रहरीले उनीहरुको साथबाट १५ ग्राम  ब्राउन सुगर र ५० वटा ट्याब्लेट समेत फेला पारेको छ । नियन्त्रणमा लिइएका चारै जनालाई आवश्यक कारवाहीको लागि बरामद लागुऔषधसहित सम्बन्धित निकायमा बुझाइएको सशस्त्र प्रहरीले जनाएको छ।