सीमाक्षेत्रमा कडाइ: एसपी चन्दको नेतृत्वमा सशस्त्र प्रहरी बाँके सफलतातर्फ

नेपालगञ्ज । सशस्त्र प्रहरी बल नं. ३० गण बागेश्वरी, बाँकेका गणपति सशस्त्र प्रहरी उपरीक्षक (एसपी) भीम बहादुर चन्दले कमाण्ड सम्हालेको १५ दिनमै सशस्त्र प्रहरी बाँकेले उल्लेखनीय उपलब्धि हासिल गर्दै आएको छ।

उनको नेतृत्वमा सीमावर्ती क्षेत्रमा निगरानी कडाइ गरिँदै जाँदा लाखौँ रुपैयाँ बराबरका विभिन्न अवैध सामग्री बरामद गरिएको सशस्त्र प्रहरीले जनाएको छ।

सीमा सुरक्षालाई उच्च प्राथमिकतामा राख्दै एसपी चन्दले सीमाक्षेत्रमा नियमित गस्ती, निगरानी तथा चेकजाँचलाई थप प्रभावकारी बनाएका छन्। विशेषगरी सीमाबाट हुने चोरी–तस्करी, अवैध ओसारपसार लगायतका गतिविधि नियन्त्रणमा कडाइ गरिएको छ।

सीमा अपराध नियन्त्रणलाई प्रभावकारी बनाउन उनले मातहतका सबै इकाइलाई स्पष्ट निर्देशन दिँदै कुनै पनि अवैध गतिविधि हुन नदिन सतर्क रहन सुरक्षाकर्मीलाई निर्देशन दिएका छन्।

सीमा सुरक्षासँगै आन्तरिक सुरक्षा व्यवस्थापनलाई पनि प्राथमिकतामा राख्दै विभिन्न स्थानमा सुरक्षा निगरानी, चेकिङ तथा समन्वयात्मक गतिविधि बढाइएको छ।
एसपी चन्दको सक्रिय नेतृत्वपछि सीमावर्ती क्षेत्रमा सुरक्षा व्यवस्थापन थप सुदृढ भएको र सीमा सुरक्षा तथा आन्तरिक सुरक्षा दुवै क्षेत्रमा सकारात्मक परिणाम देखिन थालेको स्थानीयले बताएका छन्।