भारतबाट आउँदै गरेका विनयशंकर स्रोत नखुलेको २० लाख नगदसहित सशस्त्र प्रहरीको नियन्त्रणमा

काठमाडौं । अवैध रूपमा ल्याइएको शंकास्पद स्रोत नखुलेको लाखौं रकमसहित सशस्त्र प्रहरीले एक जनालाई नियन्त्रणमा लिएको छ।

पर्साको वीरगन्ज महानगरपालिका–१६ स्थित भन्सार क्षेत्रबाट आज ५० वर्षीय विनयशंकर साह पक्राउ परेका हुन्। उनी भारतबाट बीआर ०५ बीके ८६०३ नम्बरको मोटरसाइकल चढेर नेपाल प्रवेश गर्ने क्रममा शंका लागेपछि सशस्त्र प्रहरीले जाँच गरेको थियो।

सशस्त्र प्रहरी बलको इन्टेलिजेन्स ब्युरोबाट प्राप्त सूचनाका आधारमा गरिएको चेकजाँचका क्रममा मोटरसाइकलको सिटमुनि प्लास्टिकमा बेरेर लुकाइ राखिएको नगद फेला परेको जनाइएको छ।

प्रहरीका अनुसार बरामद रकमको स्रोत पुष्टि हुन नसकेपछि साहलाई नियन्त्रणमा लिइएको हो। उनको साथबाट २० लाख २ हजार ५० रुपैयाँ नेपाली नगद र ६ सय भारतीय रुपैयाँ भेटिएको बताइएको छ।

पक्राउ परेका साह र बरामद रकमलाई थप अनुसन्धान तथा कारबाहीका लागि वीरगन्ज भन्सार कार्यालयमा बुझाइएको सशस्त्र प्रहरीले जनाएको छ।