पश्चिम नवलपरासीमा झण्डै १२ लाखको अवैध हुक्का फ्लेवर सशस्त्र प्रहरीको नियन्त्रणमा

रबिन्द्र यादव / पश्चिम नवलपरासी । पश्चिम नवलरासीको सुस्तामा सशस्त्र प्रहरीले ठूलो परिमाणमा अवैध हुक्का फ्लेवर बरामद गरेको छ । सशस्त्र प्रहरी बल नेपाल, सीमा सुरक्षा गुल्म हेड क्वाटर हरपुर (अमानिगंज) का डिएसपी प्रमोद खड्काका अनुसार सुस्ता-५ तरैनी स्थित सीमा क्षेत्रबाट उक्त सामान नियन्त्रणमा लिइएको हो ।

​सशस्त्र प्रहरीका  सई सत्यनारायण यादवको कमाण्डमा खटिएको बी.ओ.पी. बलिनगरको टोलीले शुक्रबार बेलुकी ६ बजे भारतबाट अवैध रूपमा ल्याइँदै गरेको ५,९५० पिस (२४ कार्टुन) हुक्का फ्लेवर फेला पारेको थियो । बरामद सामानको बजार मूल्य करिब रु. ११,९०,००० (एघार लाख नब्बे हजार) रहेको छ ।

​तस्करीमा प्रयोग गरिएका ३ वटा भारतीय नम्बर प्लेटका मोटरसाइकल समेत प्रहरीले नियन्त्रणमा लिएको छ। बरामद सामान र मोटरसाइकललाई आवश्यक कानुनी प्रक्रिया पूरा गरी शनिबार आवश्यक कारबाहीका लागि सम्बन्धित भन्सार कार्यालयमा बुझाइएको सशस्त्र प्रहरीले जनाएको छ ।