सशस्त्र प्रहरीका इन्स्पेक्टर ४० हजार घुससहित अख्तियारको नियन्त्रणमा

काठमाडौं । सशस्त्र प्रहरीका इन्स्पेक्टर घुससहित पक्राउ परेका छन् ।अख्तियार दुरुपयोग अनुसन्धान आयोगको टोलीले धनुषाको मिथिला नगरपालिका–१० लालगढ क्षेत्रमा सशस्त्र प्रहरीका इन्स्पेक्टर वकिल अधिकारीलाई ४० हजार रुपैयाँ घुससहित पक्राउ गरेको हो।

अख्तियार दुरुपयोग अनुसन्धान आयोगको बर्दिवास कार्यालयका अनुसार कमला–ढल्केवर–बाग्मती सडक निर्माण आयोजनामा काम गरिरहेका एक ठेकेदारसँग रकम लिँदै गरेको अवस्थामा अधिकारीलाई नियन्त्रणमा लिइएको हो।

प्रारम्भिक जानकारीअनुसार उनले निर्माणमा प्रयोग हुने सवारी साधन रोक्ने तथा काममा अवरोध गर्ने जस्ता बहाना बनाएर ठेकेदारसँग बारम्बार रकम माग्दै आएका थिए। सोही उजुरीका आधारमा अख्तियारको टोलीले निगरानी गरेर उनलाई रंगेहात समातेको हो।

हाल अधिकारीमाथि थप अनुसन्धान जारी रहेको अख्तियारले जनाएको छ।