सीमा नजिक पटेर्वा क्षेत्रबाट लाखौं रुपैयाँको अवैध सामान सशस्त्र प्रहरीको नियन्त्रणमा

काठमाडौं ।  नेपाल–भारत सीमावर्ती क्षेत्रबाट सशस्त्र प्रहरीले ठूलो परिमाणमा अवैध रूपमा ओसारपसार हुँदै गरेका सामान बरामद गरेको छ।

सशस्त्र प्रहरीका अनुसार सिरहाको सिरहा नगरपालिका–१७ पटेर्वा आसपास खटिएको सशस्त्र प्रहरी टोलीले करिब ३ लाख रुपैयाँ मूल्य बराबरका अवैध तस्करीका सामान नियन्त्रणमा लिएको हो।

सशस्त्र प्रहरी बल नम्बर ७ गण अन्तर्गत सीमा सुरक्षा गुल्म माडरबाट खटिएको टोलीले चेकजाँचका क्रममा नेपालबाट भारततर्फ र भारतबाट नेपालतर्फ लैजाँदै गरिएका सामान शंकास्पद पाएपछि नियन्त्रणमा लिएको हो।

बरामद गरिएको सामग्रीमा करिब २ लाख ५० हजार मूल्यको स ८ प १२३४ नम्बरको मोटरसाइकल, करिब २० हजार रुपैयाँ बराबरको मदिरा तथा २५ हजार २८५ रुपैयाँ मूल्य बराबरका विभिन्न पेय पदार्थ रहेका छन्।

सशस्त्र प्रहरीका अनुसार सबै सामान आवश्यक प्रक्रिया पूरा गरी भन्सार कार्यालयमा बुझाइएको छ। हालै लागू गरिएको नियमअनुसार भारतबाट १०० रुपैयाँभन्दा बढी मूल्यका सामान ल्याउँदा अनिवार्य भन्सार तिर्नुपर्ने व्यवस्था भएपछि सीमामा निगरानी कडा पारिएको सशस्त्र प्रहरीले जनाएको छ।