१९ लाख बढीको अवैध सामानसहितको ट्रक सशस्त्र प्रहरीको नियन्त्रणमा, दुई जना पक्राउ

काठमाडौं  । सशस्त्र प्रहरीले सीमावर्ती क्षेत्रबाट करिब १९ लाख रुपैयाँँ बढीको अवैध सामानसहित एक ट्रक नियन्त्रणमा लिएको छ। घटनामा संलग्न दुई जनालाई समेत पक्राउ गरिएको  सशस्त्र प्रहरीले जनाएको छ।

सशस्त्र प्रहरी प्रधान कार्यालयका अनुसार सिरहाको नवराजपुर गाउँपालिका–५ देवनगरस्थित सीमावर्ती क्षेत्रबाट १९ लाख ४७ हजार ३ सय रुपैयाँको अवैध सामानसहित स १ ख ५३५ नम्बरको ट्रक र सोही स्थानका ५० वर्षीय राजेश यादव र ३९ वर्षीय आनन्द यादवलाई पक्राउ गरिएको हो। उनीहरूलाई सशस्त्र प्रहरी बल, नेपाल नं. ७ गण सिरहाबाट खटिएको गस्ती टोलीले २ गते राति विशेष सूचनाका आधारमा नियन्त्रणमा लिएको हो।

स १ ख ५३५ नम्बरको ट्रकमा राखी नेपालबाट अवैध रूपमा भारततर्फ लैजाँदै गरेको कस्मेटिक सामग्री, टुथपेस्ट तथा करिब २ सय ६० केजी ओखर बरामद गरिएको सशस्त्र प्रहरीले जनाएको छ। नियन्त्रणमा लिइएको ट्रकको अन्दाजी मूल्य करिब २१ लाख रुपैयाँ रहेको जनाइएको छ। 

पक्राउ परेका दुवै जना चालक र सहचालक भएको सशस्त्र प्रहरीले पुष्टि गरेको छ। पक्राउ परेका व्यक्तिहरूलाई आवश्यक अनुसन्धानका लागि नेपाल प्रहरीको जिम्मा लगाइएको छ भने बरामद सामान भन्सार कार्यालय बुझाउने प्रक्रिया अघि बढाइएको सशस्त्र प्रहरीले जनाएको छ।