नक्कली रेड र ब्ल्याक लेभल रक्सी फ्याक्ट्रीमा सशस्त्र प्रहरीको छापा, ४ जना पक्राउ

ललितपुर । सशस्त्र प्रहरी बल नेपालले ललितपुरको महालक्ष्मी नगरपालिका–७ चाँगाथलीस्थित एक घरमा सञ्चालन भइरहेको नक्कली ब्राण्डेड मदिरा उत्पादन केन्द्रमा छापा मारेको छ ।

सशस्त्र प्रहरीले छापा मार्दै ठूलो परिमाणमा विभिन्न ब्राण्डका मदिरा तथा उत्पादन सामग्री बरामद गरिएको छ भने चार जनालाई नियन्त्रणमा लिएको हो ।

सशस्त्र प्रहरी बल नेपाल इन्टेलिजेन्स ब्यूरोको विशेष सूचनाको आधारमा गरिएको कारवाहीमा चाँगाथलीस्थित विर्ख बहादुर तामाङको घरमा अवैध रूपमा रेड लेबल, ब्ल्याक लेबल लगायतका महंगा ब्राण्डका नक्कली मदिरा उत्पादन भइरहेको फेला परेको हो ।

प्रहरीले घटनास्थलबाट रामेछापको खाँडादेवी गाउँपालिका–२ निवासी ३० वर्षीय मनोज खत्री, खिम्ती गाउँपालिकाका २८ वर्षीय विनोद तामाङ, २६ वर्षीय विवेक तामाङ तथा सिन्धुपाल्चोकको बाह्रबिसे नगरपालिका–६ निवासी २२ वर्षीय छिदेन निमा तामाङलाई पक्राउ गरेको जनाएको छ ।

छापाका क्रममा नक्कली मदिरा उत्पादनमा प्रयोग हुने केमिकल, उपकरण, राजस्व स्टिकर तथा होलोग्राम समेत बरामद गरिएको प्रहरीले जनाएको छ । बरामद मदिराको परिमाण भने ठूलो भएकाले यकिन गर्न बाँकी रहेको बताइएको छ ।

पक्राउ परेका व्यक्तिहरूलाई बरामद सामग्रीसहित आवश्यक अनुसन्धान तथा कारवाहीका लागि सम्बन्धित निकायमा बुझाउने प्रक्रिया अघि बढाइएको सशस्त्र प्रहरीले जनाएको छ ।