सशस्त्रका डीआईजी पोखरेल एआईजी बढुवाका लागि सिफारिस

काठमाडौं । सशस्त्र प्रहरी बलका नायब महानिरीक्षक (डीआईजी) अञ्जनी कुमार पोखरेललाई अतिरिक्त महानिरीक्षक (एआईजी) पदमा बढुवा गर्न सिफारिस गरिएको छ।

बढुवा समितिको बैठकले रिक्त रहेको एआईजी पदमा डीआईजी पोखरेलको नाम अघि बढाएको हो। कानुनी व्यवस्थाअनुसार एआईजी बढुवा समितिमा प्रधानमन्त्री तथा मन्त्रिपरिषद् कार्यालयका सचिव अध्यक्ष रहने व्यवस्था छ भने गृह मन्त्रालयका सचिव सदस्य र सशस्त्र प्रहरी महानिरीक्षक (आईजीपी) सदस्य–सचिव रहने प्रावधान छ।

हाल पोखरेल सशस्त्र प्रहरी बलको बागमती प्रदेश कार्यालयको नेतृत्व सम्हालिरहेका छन्। बढुवा सिफारिसप्रति असन्तुष्टि भए सम्बन्धित पक्षले सात दिनभित्र उजुरी दिन सक्ने जानकारी बढुवा समितिले दिएको छ।