जमुनाहा नाकामा सशस्त्र प्रहरीले गर्‍यो स्निफर डग परिचालन, सुरक्षा निगरानी कडा

नेपालगञ्ज । नेपाल–भारत सीमास्थित जमुनाहा नाका क्षेत्रमा सुरक्षा व्यवस्थालाई थप प्रभावकारी बनाउन सशस्त्र प्रहरीले स्निफर डग (तालिम प्राप्त कुकुर) परिचालन गरेको छ। पछिल्लो समय उक्त नाकाबाट लागुऔषध ओसारपसार बढ्दो क्रममा देखिएपछि नियन्त्रणलाई लक्षित गर्दै पहिलो चरणमा दुई वटा स्निफर डग परिचालन गरिएको हो।

सशस्त्र प्रहरी बल नेपाल नम्बर ३० गण हेडक्वार्टर, बागेश्वरी बाँकेका अनुसार सीमा नाकाबाट भारततर्फबाट आउने यात्रु तथा उनीहरूको सामानमा कडाइका साथ जाँच प्रक्रिया अघि बढाइएको छ। स्निफर डग प्रयोग गरी प्रत्येक शंकास्पद वस्तुको सुँघेर परीक्षण गरिँदै आएको सशस्त्र प्रहरीले जनाएको  छ।

हाल सीमा सुरक्षा गुल्म जमुनाहाबाट परिचालन गरिएका दुई वटा स्निफर डगले विशेषगरी हातहतियार, विस्फोटक पदार्थ तथा लागुऔषध पहिचानमा महत्वपूर्ण सहयोग गरिरहेका छन्। गणले सीमा सुरक्षालाई आधुनिक र प्रविधिमैत्री बनाउने रणनीतिअनुसार यस्तो अभ्यासलाई निरन्तरता दिइने जानकारी दिएको छ।

सशस्त्र प्रहरीका अनुसार  सीमामा स्निफर डग परिचालनसँगै अवैध ओसारपसार, सीमा अपराध तथा शंकास्पद गतिविधिमा संलग्न व्यक्तिहरूमा मनोवैज्ञानिक दबाब सिर्जना भई नियन्त्रण कार्य थप प्रभावकारी भइरहेको देखिएको छ।

यसैबीच, सय रुपैयाँभन्दा बढी मूल्यका सामान भारतबाट ल्याउँदा अनिवार्य भन्सार शुल्क तिर्नुपर्ने व्यवस्थामा कडाइ गरिएसँगै सुरक्षा निगरानी अझ मजबुत बनाउन स्निफर डग परिचालन गरिएको सशस्त्र प्रहरीले बताइएको छ।