सेतीमा हाम फालेर बेपत्ता भएका युवकको शवलाई निकाल्यो सशस्त्र प्रहरीले

काठमाडौं  । सेती नदीको खोचमा हाम फालेर बेपत्ता भएका युवकको शवलाई सशस्त्र प्रहरीले निकालेको छ। 

पोखरा महानगरपालिका–१७ स्थित सेती नदीको खोचमा हाम फालेर बेपत्ता भएका पोखरा–१७ घारिपाटन बस्दै आएका अन्दाजी ३४ वर्षीय मुकेश महतो जेठ १० गते बेलुका सेती नदीमा हाम फाली बेपत्ता भएका थिए।

घटनाको जानकारी प्राप्त हुनासाथ सशस्त्र प्रहरी बल नेपाल नम्बर २४ कालिका गण कास्कीबाट खटिएको टोलीले खोजी कार्य थालेको थियो। पहिलो दिन खोजी गर्दा फेला नपरेपछि आज बिहान सशस्त्र प्रहरी निरीक्षक बिनोद पौडेलको कमाण्डमा विपद् व्यवस्थापन तालिम प्राप्त टोली पुनः परिचालन गरिएको थियो।

उक्त टोलीले रोप रेस्क्यु प्रविधिमार्फत करिब २५० फिट तल रहेको सेती नदीको खोचबाट महतोको शव बाहिर निकालेको सशस्त्र प्रहरीले जनाएको छ।