नदीको टापुमा लुकाइराखिएको ४ सय ७५ किलो गाँजा सशस्त्र प्रहरीको नियन्त्रणमा

काठमाडौं । सशस्त्र प्रहरी बल, नेपालले सप्तकोशी नदीको बीचमा रहेको टापुबाट ठूलो परिमाणमा गाँजा बरामद गरेको छ।

सुनसरीको बराहक्षेत्र नगरपालिका–६ र उदयपुर जिल्लाको बेलका नगरपालिका–८ बीच पर्ने सप्तकोशी नदीको टापुमा लुकाइछिपाइ राखिएको करिब ४ सय ७५ किलो गाँजा बरामद गरिएको सशस्त्र प्रहरीले जनाएको छ।

विशेष सूचनाका आधारमा सशस्त्र प्रहरी बल, नेपाल विपद् व्यवस्थापन बेस चतराबाट सशस्त्र प्रहरी निरीक्षक मेघराज राउत तथा सुरक्षा बेस रामपुरबाट सशस्त्र प्रहरी निरीक्षक राज विक्रम खड्काको कमाण्डमा खटिएको टोलीले १६ वटा बोरामा राखिएको गाँजा फेला पारेको हो।

नदीको बीच टापुमा गाँजा लुकाइएकाले प्रहरीले ¥याप बोट प्रयोग गरी बरामद गाँजा नदी किनारमा ल्याएको जनाएको छ।

बरामद गाँजा आवश्यक अनुसन्धान तथा कानुनी कारबाहीका लागि सम्बन्धित निकायमा बुझाइएको प्रहरीले जनाएको छ।