२ लाखभन्दा बढी ट्रामाडोल क्याप्सुल र ७ किलो खैरो हिरोइन बरामद, ४ जना सशस्त्रको नियन्त्रणमा

काठमाडौं । सशस्त्र प्रहरी बल नेपालले  ठूलो परिमाणमा लागूऔषध बरामद गर्दै चार जनालाई नियन्त्रणमा लिएको छ। बरामद लागूऔषधमा २ लाखभन्दा बढी ट्रामाडोल क्याप्सुल र करिब ७ किलो ४ सय ग्राम खैरो हिरोइन रहेको छ।

सशस्त्र प्रहरी प्रधान कार्यालयका अनुसार विशेष सूचनाका आधारमा जेठ १२ गते भक्तपुरको मध्यपुर थिमी–६ कमेरेटारबाट काभ्रे पनौती नगरपालिका–५ घर भई भक्तपुर कटुन्जेमा बस्दै आएका ४१ वर्षीय विरध्वज तामाङलाई नियन्त्रणमा लिएर थियो। उनको बयानका आधारमा ललितपुरको गोदावरी नगरपालिका–२ विशंखुनारायण क्षेत्र नजिक पत्करले छोपेर राखिएको ६ वटा बोरा र २ वटा चाउचाउको कार्टुनबाट ट्रामाडोल हाइड्रोक्लोराइड (ट्रामाडोल–५००) नामक लागूऔषध २१ हजार ६४ पत्ता अर्थात् २ लाख १० हजार ६ सय ४० क्याप्सुल बरामद गरिएको सशस्त्र प्रहरीले जनाएको छ।

प्रारम्भिक अनुसन्धानबाट उक्त लागूऔषध केही दिनअघि काठमाडौं भित्रिएको र विरध्वज तामाङले कलंकीबाट ललितपुरको चाँगाथलीसम्म पुर्‍याएको खुलेको छ। त्यसपछि काभ्रेको कोशीपारी–१ स्थायी घर भई ललितपुर हरिसिद्धिमा बस्दै आएका ३८ वर्षीय ट्याक्सी चालक सान्तबहादुर तामाङले हरिसिद्धीमा राखेर पछि गोदावरी क्षेत्रमा लुकाएको अनुसन्धानबाट देखिएको सशस्त्र प्रहरीको भनाइ छ।

यस घटनामा संलग्न रहेको आरोपमा सान्तबहादुर तामाङलाई बागमती प्रदेश ०१–००२ ज ८८६३ नम्बरको ट्याक्सीसहित जेठ १८ गते नियन्त्रणमा लिइएको छ। लागूऔषध ओसारपसार तथा लुकाउन ट्याक्सी प्रयोग गरिएको आशंकामा उनीमाथि थप अनुसन्धान भइरहेको छ।

यसैबीच, मोरङको रंगेली नगरपालिका–४ चोप्राहा स्थित सीमा क्षेत्रमा जेठ १८ गते खैरो हिरोइनसहित दुई जनालाई नियन्त्रणमा लिइएको सशस्त्र प्रहरीले जनाएको छ। नियन्त्रणमा पर्नेहरूमा उर्लाबारी नगरपालिका–४ निवासी ३२ वर्षीय अभिषेक कार्की र बेलबारी नगरपालिका–२ निवासी २९ वर्षीय नवीन निरौला रहेका छन्।

सशस्त्र प्रहरी बलको बोर्डर आउटपोस्ट रंगेली र नेपाल प्रहरीको संयुक्त टोलीले भारतबाट नेपालतर्फ आउँदै गरेका उनीहरूमाथि जाँच गर्दा अभिषेक कार्कीले शरीरका विभिन्न भागमा लुकाइछिपाइ ल्याउँदै गरेको करिब ७ किलो ४ सय ग्राम खैरो हिरोइनजस्तो देखिने पदार्थ फेला पारेको थियो।

सशस्त्र प्रहरी बलका अनुसार नियन्त्रणमा लिइएका सबै व्यक्तिलाई बरामद लागूऔषध तथा सम्बन्धित सामग्रीसहित आवश्यक अनुसन्धान र कानुनी कारबाहीका लागि नेपाल प्रहरीलाई बुझाइएको छ।