बाँकेमा ट्याक्टरसहित लाखौंको अवैध सामान सशस्त्र प्रहरीको नियन्त्रणमा, लागूऔषधसहित २ जना पक्राउ

नेपालगञ्ज।  सशस्त्र प्रहरीले बाँकेबाट लाखौं रुपैयाँको अवैध सामान र लागू औषध सहित दुई जनालाई पक्राउ गरेको छ।

सशस्त्र प्रहरी बल, नेपाल नं.३० गण मुख्यालय बागेश्वरी बाँके तथा मातहत इकाइबाट खटिएको टोलीले २ दिनको अवधिमा २१ लाख ७९ हजार १८१ रुपैयाँ बराबरको अवैध सामान बरामद गरेको हो।

सशस्त्र प्रहरी बाँकेका अनुसार असार १८ र १९ गते भारतबाट अवैध रूपमा नेपालतर्फ ल्याइँदै गरेको औषधि, लत्ताकपडा, पेय पदार्थ, किराना सामान, सुर्तिजन्य पदार्थ, हरियो तरकारी, काठ, एक थान मोटरसाइकल र एक थान ट्र्याक्टर बरामद गरिएको हो।

त्यसै क्रममा प्रहरीले लागूऔषध कारोबारमा संलग्न रहेको आरोपमा दुई जनालाई नियन्त्रणमा लिएको छ। पक्राउ पर्नेमा बाँकेको जानकी गाउँपालिका–५ गुरुवागाउँ निवासी ३० वर्षीय विष्णु यादव र दाङको तुल्सीपुर उपमहानगरपालिका–३ दमारगाउँ निवासी २६ वर्षीय शेरबहादुर विश्वकर्मा रहेका छन्।

उनीहरूको साथबाट ६४० मिलिग्राम ब्राउन सुगर, २१० ट्याब्लेट ट्रामाडोल, ४० ट्याब्लेट नाइट्रोभेट तथा ६ ट्याब्लेट स्पास पराक्स बरामद गरिएको सशस्त्र प्रहरीले जनाएको छ।

बरामद गरिएका अवैध सामानहरू आवश्यक कारबाहीका लागि नेपालगञ्ज भन्सार कार्यालय बाँकेमा बुझाइएको छ भने लागूऔषधसहित पक्राउ परेका दुवै जनालाई थप अनुसन्धान तथा कानुनी कारबाहीका लागि नेपाल प्रहरीको जिम्मा लगाइएको छ।

सशस्त्र प्रहरी बलले सीमा क्षेत्रमा तस्करी तथा लागूऔषध ओसारपसार नियन्त्रणका लागि निगरानी र कारबाहीलाई तीव्र बनाएको जनाएको छ।