सशस्त्र प्रहरीका एआईजी अन्जनी पोखरेलको मानवश्रोत विभागमा पदस्थापन

काठमाडौँ ।  सशस्त्र प्रहरीका एआईजी  अन्जनी कुमार पोखरेललाई मानवश्रोत विभागको प्रमुखको जिम्मेवारी दिइएको छ। 

मन्त्रिपरिषद्ले जेठ १९ गते पोखरेललाई एआईजी पदमा बढुवा गर्ने निर्णय गरेको थियो।

बढुवापछि सोमबार  आईजीपी नारायणदत्त पौडेलले पोखरेललाई दर्ज्यानी चिन्ह प्रदान गरेका थिए। त्यसलगत्तै उनलाई मानवश्रोत विभागमा पदस्थापन गरिएको गृह मन्त्रालय स्रोतले जनाएको छ। आईजीपी पौडेल संगठन प्रमुख नियुक्त भएपछि उक्त विभाग प्रमुखविहीन बनेको थियो।

पोखरेल सशस्त्र प्रहरी बल स्थापना भएपछि ‘सिसम–१’ ब्याचमार्फत संगठनमा प्रवेश गरेका अधिकृत हुन्। उनको बढुवासँगै सशस्त्र प्रहरीमै भर्ना भएका अधिकृतहरू भविष्यमा संगठनको सर्वोच्च नेतृत्वसम्म पुग्ने सम्भावना थप बलियो बनेको विश्लेषण गरिएको छ। हालसम्म भने संगठनको नेतृत्व प्रायः नेपाल प्रहरी वा नेपाली सेनाबाट आएका अधिकृतहरूले सम्हाल्दै आएका छन्।