पुरस्कार र दण्डको नीति कडाइका साथ लागू गर्न सशस्त्र प्रहरी प्रमुख पौडेलको निर्देशन

काठमाडौं।  सशस्त्र प्रहरी प्रमुख (आईजीपी) नारायण दत्त पौडेलले सशस्त्र प्रहरी कर्मचारीहरूमा पुरस्कार र दण्डको नीतिलाई कडाइका साथ लागू गर्दै राष्ट्र, संगठन तथा आमजनताको अपेक्षा अनुरूप थप व्यावसायिकता र ऊर्जाका साथ कार्य गर्न निर्देशन दिएका छन्।

सशस्त्र प्रहरी बल नेपाल प्रधान कार्यालयमा आयोजित कार्यक्रममा विभिन्न युनिटको कमाण्ड सम्हाल्न जान लागेका अधिकृतहरूलाई प्रत्यक्ष तथा भर्चुअल माध्यमबाट निर्देशन दिँदै उनले कार्यक्षेत्रमा खटिँदा कुनै पनि कमजोरी नगरी जिम्मेवारी निर्वाह गर्नुपर्ने बताए।

उनले मातहतका कर्मचारीहरूको मनोबल उच्च राख्न, उनीहरूको समस्या तथा आवश्यकताको समयमै पहिचान गर्न र तल्लो तहसम्म प्रत्यक्ष सम्पर्कमा रही काम गर्नुपर्नेमा जोड दिए। साथै कर्मचारीहरूको पीर, मर्का र गुनासोलाई चेन अफ कमाण्डमार्फत सम्बोधन गर्न निर्देशन दिए।

आईजीपी पौडेलले फिल्डमा खटिने सशस्त्र प्रहरी कर्मचारीहरूले नतिजामुखी ढंगले काम गर्न सके राष्ट्र र संगठनको प्रतिष्ठा बढ्नुका साथै कमाण्डर र मातहतबीचको सम्बन्ध थप सुदृढ हुने बताए। उनले संगठनले गर्ने पारदर्शी र सकारात्मक कामकारबाही जनस्तरसम्म पुग्नुपर्ने उल्लेख गरे।

उनले सशस्त्र प्रहरी कर्मचारीहरूलाई सस्तो लोकप्रियता र मिडियाबाजीभन्दा आफ्नो जिम्मेवारी र कर्तव्यलाई प्राथमिकता दिन आग्रह गर्दै सामाजिक सञ्जालको प्रयोगलाई व्यवस्थित बनाउन सबै तहका कमाण्डरहरू सचेत हुनुपर्ने बताए।

राजस्व चुहावट नियन्त्रण तथा सीमा क्षेत्रमा हुने अवैध चोरी–तस्करीविरुद्ध कडा रूपमा प्रस्तुत हुनुपर्ने बताउँदै उनले नेपाल सरकारले प्रतिबन्ध लगाएका वस्तुहरू सीमाबाट भित्रिन नदिन थप सक्रियता देखाउन निर्देशन दिए।

उनले बाहिनी मुख्यालयहरूले मातहतका युनिटहरूसँग समन्वय र सहकार्य बढाएर कामकारबाहीलाई थप प्रभावकारी बनाउनुपर्ने बताए। साथै सीमामा परिचालित सशस्त्र प्रहरी कर्मचारीहरूले सरोकारवाला निकाय तथा समकक्षीसँगको सहकार्यलाई अझ सुदृढ बनाउनुपर्नेमा जोड दिए।

आर्थिक पारदर्शिता, लैङ्गिक हिंसा तथा मानवअधिकारका विषयमा संगठनले शून्य सहनशीलताको नीति अवलम्बन गरेको उल्लेख गर्दै उनले सोही अनुरूप कार्य गर्न निर्देशन दिए।

हालै सल्यान र जाजरकोटमा गल्ती गर्ने कमाण्डरमाथि कारबाही गरिएको स्मरण गराउँदै उनले बिओपी नेचुङका कमाण्डरमाथि पनि छानबिन भइरहेको जानकारी दिए। साथै नेपाल एपीएफ स्कुल सम्बन्धी विषयमा जेठ २५ गते छानबिन समिति गठन गरी सत्यतथ्य बुझ्ने प्रक्रिया अघि बढाइएको बताए।