९ सय २२ किलो गाँजासहितको वानटन गाडी बरामद, स्कर्टिङ गरेको मोटरसाइकल नियन्त्रणमा

काठमाडौं । सशस्त्र प्रहरीले  ठूलो परिमाणमा गाँजासहितको वानटन गाडी बरामद गरेको छ। सशस्त्र प्रहरीले मोरङको जहदा गाउँपालिका–७ स्थित महादेवकोल क्षेत्रबाट ९ सय २२ किलोग्राम गाँजा बरामद गरेको हो।

नेपाल सीमा सुरक्षा गुल्म सोराभाग र बोर्डर आउट पोस्ट नोचाबाट खटिएको टोलीले विशेष सूचनाका आधारमा गए राति करिब ११ बजे लक्ष्मिनियाबाट तारीगामातर्फ जाँदै गरेको को १ ख ७०२२ नम्बरको वानटन पिकअप गाडी जाँच गर्ने क्रममा गाँजा फेला पारेको सशस्त्र प्रहरीले जनाएको छ।

सशस्त्र प्रहरीका अनुसार गाडीमा धानको भुसाका बोरामुनि लुकाएर राखिएको २९ पोका गाँजा बरामद गरिएको हो। उक्त गाँजाको तौल ९ सय २२ किलोग्राम रहेको छ।

गाँजा ओसारपसारमा प्रयोग भएको गाडीलाई स्कर्टिङ गरिरहेको बीआर ३८ जेड ७४५२ नम्बरको भारतीय मोटरसाइकल समेत प्रहरीले नियन्त्रणमा लिएको छ। तर गाडी र मोटरसाइकल चालक भने फरार भएका छन्।

बरामद गाँजा, पिकअप गाडी र मोटरसाइकल आवश्यक कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ।