सरकारी गाडीमा पारिवारिक सयर, सुस्ता गाउँपालिकाका हाकिमको स्कार्पियो दुर्घटना

पश्चिम नवलपरासी । नवलपरासी पश्चिमको सुस्ता गाउँपालिकाका प्रमुख प्रशासकीय अधिकृत हुमलाल भुषालले सरकारी सवारी साधनको चरम दुरुपयोग गर्दा एक गम्भीर दुर्घटना भएको छ ।

नियम कानुनलाई धज्जी उडाउँदै श्रीमतीको व्यक्तिगत कामका लागि सरकारी गाडी प्रयोग गरेर पारिवारिक सयरमा निस्किएका भुषाल चढेको गाडी शुक्रबार सुनवल-१२ हरकट्टामा दुर्घटनामा परेको हो ।

​बुटवलतर्फबाट फर्किँदै गरेको सुस्ता गाउँपालिकाको प्र ०१–००१ झ ००६९ नम्बरको स्कार्पियो गाडी र विपरीत दिशाबाट आइरहेको बा.प्र ०३–००१ ख ४८१९ नम्बरको ट्रक एकापसमा ठोक्किएका थिए ।

प्रहरीका अनुसार दुर्घटनामा परेर गाउँपालिकाका सवारी चालक सामान्य घाइते भएका छन् भने अन्य यात्रुहरू भने सकुशल रहेका छन् । सरकारी गाडीमा ठूलो क्षति पुगेको स्रोतले जनाएको छ ।