कर्णालीमा बेपत्ता गाडी र यात्रुको खोजीका लागि सोनार क्यामरा र म्याग्नेटसहित गोताखोर टोली परिचालन

नेपालगञ्ज । दैलेखको चामुण्डा बिन्द्रासैनी नगरपालिका–७ साङ्गेताडास्थित कर्णाली राजमार्गमा भएको सवारी दुर्घटनापछि कर्णाली नदीमा बेपत्ता भएको गाडी र यात्रुको खोजीका लागि सशस्त्र प्रहरी बल, नेपालले अत्याधुनिक उपकरणसहित थप गोताखोर टोली परिचालन गरेको छ।

सशस्त्र प्रहरी बलको विपद् व्यवस्थापन तालिम शिक्षालय, कुरिनटारबाट सशस्त्र प्रहरी निरीक्षक प्रेमबहादुर तामाङको कमाण्डमा चार सदस्यीय गोताखोर टोली असार १९ गते घटनास्थलतर्फ प्रस्थान गरेको हो। टोलीले आज घटनास्थल पुगेर खोजी अभियान सञ्चालन गर्ने जनाइएको छ।

खोजीकार्यलाई प्रभावकारी बनाउन टोलीले पानीमुनि तथा तीव्र बहावमा रहेका वस्तु पहिचान गर्न प्रयोग हुने सोनार क्यामरा, म्याग्नेट लगायतका विशेष उपकरण साथमा लगेको सशस्त्र प्रहरीले जनाएको छ।

सुर्खेतबाट कालिकोटतर्फ जाँदै गरेको कर्णाली प्रदेश ०२–००१ ख १०५५ नम्बरको फोर्स गाडी असार १८ गते सडकबाट करिब ६ देखि ७ सय मिटर तल कर्णाली नदीमा खसेर दुर्घटनामा परेको थियो। दुर्घटनाको जानकारी प्राप्त हुनासाथ उद्धार तथा खोजीका लागि सशस्त्र प्रहरी बल, नेपाल गुल्म दैलेख, माथिल्लो कर्णाली जलविद्युत् आयोजना सुरक्षा बेस तथा सशस्त्र प्रहरी बल नं. ६ महेश्वरी बाहिनी मुख्यालय सुर्खेतबाट ६ जना गोताखोरसहितको टोली परिचालन गरिएको थियो।

दुर्घटनाकै दिन घटनास्थलबाट करिब ४ सय मिटर तल भिरमा अड्किएको अवस्थामा एक पुरुषको शव फेला पारेर निकालिएको थियो। तर दुर्घटनाग्रस्त गाडी तथा अन्य यात्रुको अवस्था हालसम्म अज्ञात रहेकाले खोजी कार्य निरन्तर जारी रहेको सशस्त्र प्रहरीले जनाएको छ।