यूएन शान्ति मिसनमा एपीएफको भूमिका विस्तारबारे महानिरीक्षक पौडेलको उच्चस्तरीय भेटवार्ता

काठमाडौं । संयुक्त राष्ट्रसंघद्वारा आयोजित पाँचौँ संयुक्त राष्ट्रसंघीय चिफ अफ पुलिस समिट (यूएनकप्स–२०२६) का क्रममा सशस्त्र प्रहरी बल, नेपालका महानिरीक्षक नारायणदत्त पौडेलले संयुक्त राष्ट्रसंघ तथा विभिन्न मित्रराष्ट्रका उच्चपदस्थ अधिकारीहरूसँग उच्चस्तरीय द्विपक्षीय भेटवार्ता गरेका छन्।

समिटका क्रममा महानिरीक्षक पौडेलले संयुक्त राष्ट्रसंघका शान्ति कार्य विभागका अवर महासचिव जाँ–पियरे लाक्रोआ, सञ्चालन सहयोग विभागकी सहायक महासचिव लिसा बटेनहाइम, संयुक्त राष्ट्रसंघीय प्रहरी सल्लाहकार फैसल शाहकार, छनोट तथा भर्ना शाखाका प्रमुख अता येनिगुन, संयुक्त अरब इमिरेट्सकी उच्च अधिकारी डाना हुमैद अल मरजुकी तथा संयुक्त राष्ट्रसंघका लागि नेपालका स्थायी प्रतिनिधि लोकबहादुर थापासँग छुट्टाछुट्टै भेटवार्ता गरेका हुन्।

भेटवार्ताका क्रममा विश्व शान्ति स्थापनाप्रति नेपालको निरन्तर प्रतिबद्धता दोहोर्याउँदै संयुक्त राष्ट्रसंघसँगको सहकार्यलाई अझ सुदृढ बनाउने, साथै आगामी संयुक्त राष्ट्रसंघीय शान्ति मिसनहरूमा सशस्त्र प्रहरी बल नेपालको सहभागिता र भूमिकालाई थप प्रभावकारी बनाउने विषयमा विस्तृत छलफल भएको सशस्त्र प्रहरीले जनाएको छ।

त्यस अवसरमा सहभागी उच्चपदस्थ अधिकारीहरूले संयुक्त राष्ट्रसंघीय शान्ति मिसनहरूमा सशस्त्र प्रहरी बल, नेपालले प्रदर्शन गरेको व्यावसायिकता, दक्षता, अनुशासन र उत्कृष्ट कार्यसम्पादनको प्रशंसा गर्दै आगामी दिनमा समेत सहकार्यलाई थप मजबुत बनाउने प्रतिबद्धता व्यक्त गरेका थिए।