नेपालगञ्जको जमुनाहबाट सशस्त्र प्रहरीले बरामद गर्‍यो स्रोत नखुलेको ५ लाख भारु

नेपालगञ्ज । बाँकेको जमुनाह नाकामा सशस्त्र प्रहरीले स्रोत नखुलेको भारतीय रुपैयाँ (भारु) ५  लाख बरामद गरेको छ।

सशस्त्र प्रहरी बल, नेपाल सीमा सुरक्षा गुल्म जमुनाहबाट खटिएको टोलीले नेपालगञ्ज उपमहानगरपालिका–१५, जमुनाह क्षेत्रमा नियमित चेकजाँच गर्ने क्रममा उक्त रकम बरामद गरेको हो। बरामद गरिएको भारतीय मुद्रा रु. ५ लाख बराबर रहेको सशस्त्र प्रहरीले जनाएको छ।

सशस्त्र प्रहरीले सोमबार बरामद गरेको ५ लाख भारुलाई सम्बन्धित कानुनी प्रक्रियाका लागि राजस्व तथा अनुसन्धान निकायमा आज बुझाउने तयारी गरिएको जनाएको छ।

यसैबीच, सशस्त्र प्रहरी बल नं. ५ विन्ध्यावासिनी बाहिनीमा डीआईजी दीपक अधिकारीले कमाण्ड सम्हालेयता सीमा क्षेत्रमा हुने अवैध गतिविधिविरुद्ध सुरक्षा निगरानी थप कडा बनाइएको छ। सीमा अपराध नियन्त्रण, अवैध तस्करी तथा गैरकानुनी कारोबार रोकथामका लागि सशस्त्र प्रहरी अझ आक्रामक रूपमा परिचालन भइरहेको बताइएको छ।

हाल जमुनाह नाका लगायत बाँकेका विभिन्न सीमावर्ती क्षेत्रमा चेकजाँचलाई तीव्रता दिइएको छ भने अवैध कारोबारमा संलग्न व्यक्तिमाथि निगरानी बढाइएको सशस्त्र प्रहरी स्रोतले जनाएको छ।