तस्करीविरुद्ध बिओपी साईगाउँ आक्रामक, ६ लाख ४१ हजारको अवैध सामान बरामद

बाँके । सशस्त्र प्रहरी बल, नेपालको बाँकेस्थित बिओपी साईगाउँले लाखौँ रुपैयाँ बढीको  ठूलो परिमाणमा अवैध लत्ताकपडासहित दुई वटा मोटरसाइकललगायतका सामान बरामद गरेको छ।

केही दिनको अन्तरमा बिओपी साईगाउँबाट सशस्त्र प्रहरी निरीक्षक निरज कार्कीको कमाण्डमा खटिएको टोलीले पचपोखरा सीमा नाकाबाट अवैध रूपमा भारतबाट ल्याउँदै गरेको कुल ६ लाख ४१ हजार रुपैयाँ बराबरको अवैध लत्ताकपडा, तस्करीमा प्रयोग गरिएको दुई वटा मोटरसाइकल र फुलसहित एक जनालाई नियन्त्रणमा लिएको सशस्त्र प्रहरी बाँकेले जनाएको छ।

सशस्त्र प्रहरी बाँकेका अनुसार बिओपी साईगाउँले अवैध तस्करीविरुद्ध गरेको कारबाहीअन्तर्गत सोमबार साँझ १ लाख १० हजार रुपैयाँ बराबरको एउटा मोटरसाइकल र फुल बरामद गरेको थियो। त्यसको अघिल्लो दिन आइतबार मात्रै ३ लाख रुपैयाँ बराबरका २ सय पिस लेडिज कुर्ता–सुरुवाल बरामद गरिएको थियो।

त्यसैगरी, शनिबार पनि बिओपी साईगाउँले २ लाख ३१ हजार रुपैयाँ बराबरका ९ रोल सुट–पेन्ट र ११ रोल सर्टको कपडासहित एक थान मोटरसाइकल नियन्त्रणमा लिएको सशस्त्र प्रहरीले जानकारी दिएको छ। सो क्रममा अवैध तस्करीमा संलग्न एक जनालाई पनि नियन्त्रणमा लिइएको सशस्त्र प्रहरी बाँकेले जनाएको छ।

बिओपी साईगाउँको कारबाहीमा बरामद गरिएका सबै अवैध सामान, दुई थान मोटरसाइकल र नियन्त्रणमा लिइएका एक जनालाई आवश्यक कारबाहीका लागि नेपालगञ्ज भन्सार कार्यालयमा बुझाइएको सशस्त्र प्रहरी बाँकेले जनाएको छ।