रुपन्देही पुगेर आईजीपी पौडेलले भने– सीमा अपराधमा निर्मम बन्नू 'आर्थिक प्रलोभनमा नपर्नू'

रुपन्देही  । सशस्त्र प्रहरी बल नेपालका महानिरीक्षक (आईजीपी) नारायणदत्त पौडेलले लुम्बिनी प्रदेशका सीमावर्ती क्षेत्रमा हुने अवैध गतिविधि नियन्त्रणलाई थप प्रभावकारी बनाउन मातहतका सशस्त्र प्रहरी कर्मचारीलाई कडा निर्देशन दिएका छन्।

आइतबार  रुपन्देहीस्थित सशस्त्र प्रहरीका बाहिनी, गण, गुल्म, बोर्डर आउट पोस्ट (बीओपी) तथा सुरक्षा पोस्टमा कार्यरत प्रहरी कर्मचारीलाई आईजीपी पौडेलले सीमा अपराध नियन्त्रण, लागूऔषध ओसारपसार रोकथाम, अवैध चोरी–निकासी नियन्त्रण तथा राजस्व चुहावट न्यूनीकरणलाई उच्च प्राथमिकतामा राखेर नतिजामुखी ढंगले काम गर्न निर्देशन दिएका हुन्।

उनले सीमामा हुने अवैध गतिविधि रोक्न समयमै योजना बनाएर प्रभावकारी परिचालन हुनुपर्नेमा जोड दिँदै सकारात्मक सोच, फरक कार्यशैली, उच्च व्यावसायिकता, पूर्ण जिम्मेवारी र बफादारिताका साथ काम गर्न अवगत गराएका हुन् ।

आईजीपी पौडेलले कुनै पनि आर्थिक प्रलोभनमा नपरी अवैध गतिविधिविरुद्ध कठोर रूपमा प्रस्तुत हुन निर्देशन दिँदै भने, “असल मनसायका साथ गरिएको काममा भएका कमीकमजोरीको जिम्मेवारी संगठनले लिन्छ, तर आर्थिक प्रलोभनमा परेर हुने कमजोरी कुनै हालतमा स्वीकार्य हुँदैन।”

उनले परम्परागत कार्यशैलीभन्दा माथि उठेर परिणाम देखिने गरी काम गर्नुपर्नेमा जोड दिँदै सीमावर्ती क्षेत्रका स्थानीयसँग सुमधुर सम्बन्ध कायम राख्न र सीमा वारपार गर्ने सर्वसाधारणलाई सहज, सुरक्षित तथा मर्यादित सेवा प्रदान गर्न निर्देशन दिए।

महानिरीक्षक पौडेलले ‘सीमावासीसँग सशस्त्र प्रहरी’ कार्यक्रमलाई अझ प्रभावकारी रूपमा सञ्चालन गर्न, सीमामा हुने अवाञ्छित गतिविधि, अन्तरदेशीय अपराध तथा सम्भावित घटना–दुर्घटनाप्रति उच्च सतर्कता अपनाउन र आवश्यक सुरक्षा तयारीलाई सुदृढ बनाउन पनि निर्देशन दिएका छन्। वर्षायामलाई लक्षित गर्दै उनले बाढी, पहिरो, डुबानलगायत विपद्जन्य घटनामा तत्काल उद्धार तथा राहतका लागि विपद् व्यवस्थापन तालिमप्राप्त जनशक्ति, उद्धार उपकरण तथा आवश्यक सामग्री चौबीसै घण्टा तयारी अवस्थामा राख्न पनि मातहतका निकायलाई निर्देशन दिएका छन्।

आईजीपी पौडेलको निर्देशनले सीमावर्ती क्षेत्रमा बढ्दो लागूऔषध तस्करी, अवैध व्यापार, राजस्व चुहावट तथा अन्य सीमा अपराध नियन्त्रणमा सशस्त्र प्रहरीलाई अझ आक्रामक र परिणाममुखी ढंगले परिचालन गर्ने संकेत दिएको छ। आईजीपी पौडेलसँगै लुम्बिनी प्रदेशस्थित नं.५ बिन्ध्यावासिनी बाहिनीका प्रमुख डीआईजी दिपक अधिकारी लगायत सशस्त्र प्रहरी अधिकृतहरुको उपस्थिति रहेको थियो।