धार्मिक सहिष्णुता र राष्ट्रिय एकता जोगाउन सशस्त्र प्रहरी बलको आह्वान

काठमाडौं । सशस्त्र प्रहरी बल, नेपालले पछिल्ला दिनहरूमा देशका केही स्थानमा देखिएको असहज परिस्थितिप्रति ध्यानाकर्षण गराउँदै शान्ति, सुव्यवस्था, सामाजिक सद्भाव र राष्ट्रिय एकता कायम राख्न सबै नागरिकसँग हार्दिक अपिल गरेको छ।

सशस्त्र प्रहरी बलले जारी गरेको अनुरोधमा समाजमा शान्ति र सुव्यवस्था कायम राख्न समन्वयात्मक रूपमा सुरक्षा परिचालन भइरहेको उल्लेख गर्दै नेपाली समाजले सदियौँदेखि आपसी बन्धुत्व, सहिष्णुता, सहअस्तित्व र संवादका माध्यमबाट जटिल समस्यासमेत समाधान गर्दै आएको स्मरण गराएको छ।

बलले हुलहुज्जत, हिंसा, दंगा, तोडफोड तथा आगजनीजस्ता गतिविधिले समस्या समाधान गर्नुको सट्टा सामाजिक सद्भाव, राष्ट्रिय सुरक्षा र एकतालाई कमजोर बनाउने जनाएको छ। साथै, आवेग वा उत्तेजनामा आएर समाजमा द्वेष फैलाउने, धार्मिक सहिष्णुतामा खलल पुर्‍याउने तथा हिंसात्मक र गैरकानुनी गतिविधिमा संलग्न नहुन सबैसँग अनुरोध गरेको छ।

जारी अपिलमा सम्बन्धित घटनाको निष्पक्ष छानबिन प्रक्रिया अघि बढिसकेको उल्लेख गर्दै अहिले संयमता, धार्मिक सहिष्णुता, सामाजिक सद्भाव र राष्ट्रिय एकताको उदाहरण प्रस्तुत गर्ने समय भएको बताइएको छ। कुनै धर्म, समुदाय वा समूहप्रति घृणा, द्वेष वा उत्तेजना फैलाउने कार्यले समस्यालाई थप जटिल बनाउनुका साथै समाजलाई अपूरणीय क्षति पुर्‍याउन सक्ने चेतावनी पनि दिइएको छ।

सशस्त्र प्रहरी बलले सम्पूर्ण नेपाली दाजुभाइ तथा दिदीबहिनीहरूलाई शान्ति कायम राख्न, एकअर्काको सम्मान गर्न तथा कुनै पनि भ्रामक अभिव्यक्ति वा अपुष्ट सूचना तथा सामग्रीको प्रचार–प्रसार नगर्न आग्रह गरेको छ।