बाँकेको राप्तीमा बोलबम यात्रीको सुरक्षामा रातभर तैनाथ रह्यो सशस्त्रको विपद् उद्धार टोली

कम्दी(बाँके) । बोलबम यात्रामा सहभागी भक्तजनको सुरक्षालाई मध्यनजर गर्दै बाँकेको डुडुवा गाउँपालिका–कम्दीस्थित राप्ती नदी किनारमा सुरक्षाकर्मीको विशेष टोली रातभर तैनाथ गरिएको थियो। वर्षायामका कारण नदीमा डुब्ने तथा बग्ने सम्भावित जोखिमलाई मध्यनजर गर्दै भक्तजनको सुरक्षाका लागि विशेष सुरक्षा तथा विपद् व्यवस्थापन टोली परिचालन गरिएको हो।

नेपाल तथा भारतबाट बोलबम यात्रामा ठुलो संख्यामा  सहभागी भक्तजनको सुरक्षाका लागि सशस्त्र प्रहरी बल नेपालअन्तर्गत अस्थायी मनसुन प्रतिकार्य बेस फत्तेपुर कुण्डाको विपद् व्यवस्थापन टोली विशेष उद्धार उपकरणसहित राप्ती नदीमा रातभर तैनाथ रहेको थियो।

अस्थायी मनसुन प्रतिकार्य बेस कुण्डाका इन्चार्ज सशस्त्र प्रहरी सहायक निरीक्षक तीर्थ भाटको कमान्डमा विपद् व्यवस्थापन टोली परिचालन गरिएको सशस्त्र प्रहरीले जनाएको छ। सम्भावित नदीजन्य विपद्का बेला तत्काल उद्धार गर्न आवश्यक उपकरणसहित टोलीलाई तयारी अवस्थामा राखिएको थियो।

त्यस्तै, सम्भावित दुर्घटना तथा नदीमा डुबेका व्यक्तिको उद्धारका लागि सशस्त्र प्रहरी बल नेपाल नं. ४२ रिजर्भ गण शम्शेरगन्जबाट गोताखोरको टोलीसमेत कम्दी क्षेत्रमा परिचालन गरिएको थियो।

बोलबम यात्रालाई सुरक्षित बनाउन बाँकेका प्रमुख जिल्ला अधिकारी दिल कुमार तामाङ , जिल्ला प्रहरी कार्यालय बाँकेका प्रमुख अंगुर जिसी, सशस्त्र प्रहरी बल नेपाल नं. ३० गण बागेश्वरी बाँकेका प्रमुख भीम बहादुर चन्द लगायतको उपस्थिति र समन्वयमा ठूलो संख्यामा सुरक्षाकर्मी परिचालन गरिएको थियो।

सुरक्षा व्यवस्थापन प्रभावकारी रहेकाले बोलबम यात्रामा सहभागी भक्तजनहरू सुरक्षित रूपमा धार्मिक गतिविधिमा सहभागी भएका थिए। सशस्त्र प्रहरी बाँकेका अनुसार भक्तजनहरू आइतबार साँझ नै कम्दीस्थित राप्ती नदी किनारमा पुगेका थिए। उनीहरूले रातभर भजन–कीर्तन गर्दै जाग्राम बसेका थिए।

साउनको अन्तिम सोमबार बिहानै भक्तजनहरूले राप्ती नदीमा स्नान गरी जल संकलन गरेर आ–आफ्नो गन्तव्यतर्फ प्रस्थान गरेका छन्। नदीमा पानीको बहाव र वर्षायामको जोखिमलाई ध्यानमा राख्दै सुरक्षाकर्मीहरू रातभर नदी किनारमै सतर्क अवस्थामा बसेका थिए।

बोलबम यात्राका क्रममा ठूलो संख्यामा भक्तजन नदीमा पुग्ने भएकाले सम्भावित डुबान, बग्ने तथा अन्य दुर्घटनालाई रोक्न यसपटक सुरक्षा निकायले विपद् उद्धारमा प्रयोग हुने विशेष उपकरणसहित जनशक्ति परिचालन गरेको हो।

तस्बिरहरु-