विभिन्न स्थानबाट ५९ लाख बढीका अवैध सामान सशस्त्र प्रहरीको नियन्त्रणमा

काठमाडौं । सशस्त्र प्रहरी बल, नेपालले देशका विभिन्न स्थानमा सञ्चालन गरेको चेकजाँच तथा खानतलासी अभियानका क्रममा करिब ५९ लाख २८ हजार रुपैयाँ बराबरका अवैध चोरी–पैठारीका सामान बरामद गरेको छ।

सशस्त्र प्रहरी बलका अनुसार २०८३ साउन २८ गते विभिन्न सीमा तथा संवेदनशील क्षेत्रमा खटिएका टोलीले नियमित चेकजाँच, निगरानी तथा शंकास्पद स्थानमा खानतलासी गर्ने क्रममा ती सामान बरामद गरेका हुन्।

बरामद हुने सामानमा लत्ताकपडा, खाद्यान्न, मोटर पार्टस्, बिजुली तथा विद्युतीय सामग्रीलगायत विभिन्न किसिमका वस्तु रहेका छन्। भन्सार छली तथा अवैध रूपमा चोरी–पैठारी गरी ल्याइएका ती सामानको प्रारम्भिक मूल्य करिब ५९ लाख २८ हजार रुपैयाँ रहेको सशस्त्र प्रहरीले जनाएको छ।

सशस्त्र प्रहरीका टोलीले सीमा क्षेत्रमा हुने अवैध गतिविधि नियन्त्रण तथा चोरी–पैठारी रोक्न नियमित रूपमा चेकजाँच र निगरानीलाई तीव्रता दिँदै आएका छन्। सोही क्रममा बरामद गरिएका सामान आवश्यक कानुनी प्रक्रिया पूरा गरी सम्बन्धित निकायमा बुझाइएको सशस्त्र प्रहरी बलले जनाएको छ।